電台DJ森美，早兩年以斷食方式減肥練大隻

近年「輕斷食」(intermittent fasting) 成為十分熱門嘅控制體重飲食方法。支持者相信，藉著我哋定時暫停飲食，去喚醒人類原始嘅身體機制，以消耗身體多餘嘅能量，甚至改變飲食習慣。不過，澳洲有研究就針對斷食嘅飲食習慣，發現效果未如理想。

澳洲悉尼大學嘅研究團隊就以白老鼠為對象，研究斷食飲食法當中嘅「隔日斷食」(every-other-day fasting)，簡單嚟講就係一日食嘢一日唔食嘢。研究團隊發現，採用「隔日斷食」嘅白老鼠，整體食物攝取量少咗，但體重並無變化，而最明顯嘅就係白老鼠嘅內臟脂肪同皮下脂肪出現異變。

Mark Larance 博士

斷食改變脂肪保存機制

負責研究項目嘅 Mark Larance 博士話，好多人都以為身體脂肪係一成不變，但其實唔同部位嘅脂肪嘅組織結構都好唔同。佢哋發現呢啲白老鼠:

1. 斷食日 (禁食嗰日) 脂肪會大大消耗
2. 恢復日 (食嘢嗰日) 體內嘅脂肪酸合成迅速重建，回復禁食前嘅水平，甚至有過之而無不及
3. 皮下脂肪 (subcutaneous fat)同內臟脂肪 (visceral fat) 出現異變，尤其係「肚腩」部份，溶脂機能大大降低，所以老鼠變成大肚腩身型

Dr Larance 補充，呢個情況證明身體會適應斷食狀態，改變脂肪存放模式，以保護身體機能。不過博士同時強調，今次研究未必反映其他減肥方式 (如5:2斷食法、限制卡路里攝取等) 會出現相同情況，但今次結果睇怕都會引嚟激烈爭論了。

資料: MedicalXpress

延伸閱讀: [輕斷食減肥法] 以簡單做賣點 3個月減20磅