[大脾罅救星] 從未如此舒適的短褲仔

圖: 隨你個人喜好而定，2017年 Salomon 的短褲系列可謂大革新!

好多玩過長途比賽既山友，相信都遇過一個問題 ~ 就係大脾罅磨損 (Shit~ 真係諗起都覺得痛)。玩個毅行者或者100km賽事，閒閒地都玩十幾廿個鐘(已經算快)，通常大脾罅磨損既情況一般都係中段時間開始。你諗下~當你24個鐘完成，即係你要痛12個鐘，如果玩36個鐘，即係你要痛18個鐘………人地平時話十指痛歸心，山友就「一步痛入心」。

解決方法一般最常見既係用「花士令」，好多師兄都應該用過，小弟曾經都試過，想當年第一次玩毅行用左34個鐘。回想番每次補「花士令」都幾嘔心…….(以下內容有D不雅) 又要用手拉開條緊到爆既Tight，再用手撩D「花士令」,再伸手去已經有十幾個鐘頭汗味既大脾罅……講到呢度~「胃已反」，有D較嚴重既師兄更加可能要2-3個鐘「補妝」一次……..有時覺得有D師兄可以Share「花士令」黎用真係好有勇氣。

圖: 上一代的S-Lab Short 短褲連內膽

而小弟上年開始愛上了 Salomon 既 S-Lab 短褲仔，因為快乾又比較通爽，排汗較快，而且條內膽十分柔軟舒適，比起著 Tight 我更喜歡個種「無拘無束」既感覺。自從著左之後，玩過多次 50- 100km 既比賽我都無再用過「花士令」! 如果一條褲可以避免「皮肉之苦」，呢D錢真係唔慳得。

圖: 一條舒適既短褲真係好重要，而2017年的 S-Lab 短褲系列更為出色。

----- 廣告 Ad -----

而2017年 Salomon 的 S-Lab 短褲系列可謂大革新，而且比上一代更進一步! 另外，用家可以根據個人喜好隨意配搭。

• STEP 1 : 先選擇內膽: 分為 Boxer，Support，Compression
• STEP 2：短褲分為4、6、9三個長短
• STEP 3：可以再按需要加配一條 Belt

而夏日炎炎，當然係越少布越好，所以我就選擇左 BOXER + SHORT

實物圖

圖: S-Slab Sense Short 6 + Boxer實物圖

S-Lab Sense Short 6

輕薄如絲的用料只有40g的重量，同時富有彈性，配合人體剪裁，令你活動自如. 其快乾物料，能保持乾爽，而褲面亦有不俗的潑水功能。 另外，所有邊位有矽膠薄膜，可以減少擺動及摩擦。

圖: S-Slab Sense Short 有不俗的潑水功能，可排走表面來的雨水

----- 廣告 Ad -----

圖: S-Slab Sense Short 非常透氣，能保持乾爽~

S-Lab Sense Boxer

呢條「神之底底」可以講係S-Lab 的靈魂之作 *(唔係我講，係有一個姓Leung 既高手講的)
「神之底底」 兩旁有小袋，除了可以無聲無色地收埋 D GEL 唔俾人知之外，用既係輕薄既纖維物料，可快速吸濕排汗。 而另一重點在於其獨特既 Cutting 可以將男仕既「兄弟」完全包貼又不會與褲邊磨擦 *(其實我諗左好耐都唔知點用文字去表達 – 簡單D來講4個字：好L 舒服) 同樣在腰間，大脾，所有邊位有矽膠薄膜，可以減少擺動及摩擦。

係呢個炎炎既夏天，測試過「神之底底」3次，途程為2X-4Xkm，個種說不出的舒適……可以講係男仕「恩物」!

圖: 大脾邊位設有矽膠薄膜，兩旁有小袋可放 Gel。

圖: 穿上後實物圖

附加體驗：S-Lab Sense Tee

用既係 COCOONA 椰碳纖維物料，可快速吸濕排汗而且透薄通爽，官方表示其快乾速度係一般快乾物料既5倍！而親身測試其中有一次 Training 突然狂風大雨，全身濕透。停雨後，於大帽山開始有涼風，記得當日吹左大約5-8分鐘左右，件 Tee 已經完成乾晒，足証其快乾速度十分出色。

圖: 快速吸濕排汗而且透薄通爽 ~ 吹一陣風乾晒！

P.S. 「有毒」溫提 ~ 女仕都有 S-Lab Short and Skirt 系列

詳細參考可見以下連結: http://modular.salomon.com/us/