[跑壇怪傑] 香港有泳衣男 英國有底褲佬

圖片來源

香港跑壇「泳衣男」，經常出沒各大小比賽。堂堂男子身穿女裝泳衣跑步，聲稱係為悼念一位意大利運動員。(#講還講唔好貼相，見《[專訪泳衣男] 我想喚醒大眾》)

喺英國，竟然又有奇裝異服嘅大男人喺長跑比賽出現，筆者稱佢哋為「底褲佬」。無錯，佢哋真係著住條底褲參加比賽!

說話有位英國人 Jamie Smalley 去咗紐約跑步，點知跑完之後，啲鬼鼠位都會畀底褲磨到損晒，好鬼痛。有次佢留意到啲女性內衣，有種叫氨綸嘅物料 (英文叫 Spandex 或 Lycra)超有彈性，伸展幅度可達600%。

Jamie 朋友入面，有個叫 Richard Edmonds，由阿爺嗰代開始靠做襪起家 (都算係成衣生產商)。於是 Smalley 同 Edmonds 拍搭生產男裝跑步內褲。

圖片來源

而佢就索性著住條底底，赤裸上身，參加唔同嘅長跑比賽。

結果，佢哋嘅產品喺2013年倫敦馬Expo首次推出，仲一次過賣咗400條。現時，佢哋仲推出男女裝底衫褲，售價由25英鎊至60英鎊不等 (約港幣257至618)。

咁究竟係佢哋嘅產品設計得好而受歡迎，定係著底褲條蹺令人氣大盛? 筆者不得而知。補充一句，上面呢個故事載於英文版《Runner’s World》，睇睇下篇文又幾似新聞稿喎……做生意，始終都係marketing最緊要!

資料來源: Runderwear

Fitz連結: https://fitz.hk/?p=115956