講裝備，女生選擇一定比男生多
唔少人都話跑步好慳錢，講得出呢句嗰個人一定唔係跑友。新手決心去跑步，第一件事應該要留意下需要添置咩裝備。當然，你仍可以好堅決話著對跑鞋都可以跑。OK Fine，不過既然做運動係樂事，點解唔令自己舒服輕鬆啲呢？
- 鞋：唔使多講，跑鞋一對。跑鞋最緊要啱自己腳型，唔係講款。（雖然好多跑友嘅跑鞋都以顏色款式行先。）而時下跑鞋已進展有跑山鞋、跑街鞋、長課鞋，甚至有扁平足設計。新手跑友可先去大型品牌旗艦店，用機器Scan下對腳，知道自己腳型先揀鞋（當然去小店買最好啦）。買咗對鞋後，唔好即刻用嚟跑步，著番幾日等對鞋再軟啲先去操番課。
- 衫：夏天嚟講，當然越透氣，越快乾越好。買咗之後先洗一次，以免車線會磨損皮膚。咁係咪背心最啱夏天著？又唔一定喎，有人鍾意短袖唔鍾意背心，覺得背心可吸走腋下汗水。
- 褲：長褲短褲各有所好，但仍以快乾為佳。
- 內衣褲：有人鍾意唔著（大多跑褲有內膽），但如果跑長距離，汗水會積聚在肶罉或pat pat，排汗好嘅內褲係必需。至於女生胸圍，以合身具彈性為合。
- 太陽帽：戴帽固然可以遮太陽，亦可以防止頭上嘅汗水滴到眼睛，所以夜晚都不妨戴帽。當然，你想以70年代打扮見人，亦不妨用當年嘅網球王子波格嘅headband。
- 手巾：抹汗之用。有人鍾意用面衫，用衫袖，有人用毛巾手箍，個人選擇而已。
- 襪：厚襪薄襪係無乜所謂，不過襪一定要緊貼雙腳，襪有鬆位易令雙腳起水泡。（所以通常貴襪都會在襪嘅中間加多重橡筋。）
- 錶/apps：計時之用。你當然可以話你享受跑步，唔重視自己嘅成績。不過計時可令你練跑更有目標，更有推動力。而且，當今嘅運動手錶以及手機Apps，已有埋訓練計劃、心肺功能，甚至可約朋友一齊隔空練習，跑步更有樂趣。
當然好多跑友仲有一個採購checklist，入面有咩壓力褲、偏光眼鏡、壓力襪、耳機、能量食品等等。新手嚟講，搞掂上面呢八樣先啦，要買嘢你驚無機會？
大熱天時，購置裝備都要有針對性
----- 廣告 Ad -----
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」