我心目中理想嘅行山杖
上文講 Maglite電筒，有人叫我介紹行山杖。其實我呢啲上一代江湖，都只能夠講啲過時嘢。好似話行山杖咁，現今流行嘅碳纖行山杖係好輕，攜帶方便兼價錢貴 (隨時過千蚊一對)，不過就幼過筷子，見啲跑手俠士撐住上山，真係驚佢哋會斷pole。
用力屈曲行山杖，應該可感受佢嘅堅固
7075鋁合金
以前我哋買行山杖，都唔會點理款式、型號，總之啱手型、高度，杖身紥實，已經好滿意。不過我哋一定會留意製造物料。我哋有人會推介「7075鋁合金」嘅行山杖。
----- 廣告 Ad -----
呢種叫「7075」嘅鋁合金，以鋁同鋅結合，能防止金屬疲勞 (即係用耐咗唔會變型、折曲)，富彈性，方便打造成唔同形狀，而且重量輕。呢種金屬用於飛機結構、M16機關槍、裝甲車以及單車車架。弊病係抗腐蝕能力低，所以產品要有高質量嘅防腐涂漆。
現今碳纖維行山杖大行其道，但是碳纖昂貴，欠彈性，只要用錯方式使用，往往會令行山杖折斷。所以若然負重行遠路，或者日常行街，我都係寧願用番啲古老嘢。
杖頭有帶索
伸縮式行山杖，要留意較位
小心杖頭，防咗舊膠會篤到人。
行街用行山杖選購要點
- 杖身堅固
- 杖頭防濕膠可除
- 伸縮型比摺合穩陣
- 杖頭有套索，可套於手腕，不易掉落
- 價錢平，用爛咗、唔見咗、掉低咗，都唔會肉赤
資料: 維基百科
----- 廣告 Ad -----
Fitz連結: https://fitz.hk/?p=123270
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。