一窩蜂行山，一窩蜂郊遊，一窩蜂打卡……一窩蜂做成嘅問題確實令唔少人吃不消。上次提及過有郊區村民搭唔到小巴，長洲居民因為太多賓客唔戴口罩而產生恐慌。呢次係一班西貢居民嘅怒哮。
Facebook 專頁 Sai Kung Nightmares，於星期六發表一輯相，講周末下午嘅人潮。從圖片之中，睇到大批市民逼爆窄窄嘅西貢街道，而西貢特有嘅小型食店都坐滿人。圖片所見，大多數市民雖然有戴口罩，不過疫症橫行期間，咁大批人群聚集，始終都係傳播疫症嘅溫床。
遊客令街道、餐廳逼滿人，亦令該區交通嚴重負荷。出入九龍嘅交通喺周末時份整日都行車緩慢，而西貢碼頭一帶因為太多私家車同的士等客，小巴同巴士往往難以駛入站頭。
事實上，西貢之外，大美督、三門仔、石澳、大澳、長洲、坪洲等郊遊熱點，近呢兩個月都人滿為患。
可實行短期措施
相信呢股「避疫」人潮會維持至少三兩個月，如果係咁，政府係咪可以實行一啲短期措施，令住喺該區嘅居民無咁受滋擾呢?
- 推行「居民乘車證」，可優先乘搭公共交通工具
- 在周末或假期時，加強違例泊車、亂拋垃圾、亂過馬路等檢控工作
- 政府對抗疫要加強宣傳，勸喻市民不要前往人多地方，甚至人與人要保持距離
新加坡在公眾地方實施「保持一米距離」措施，排隊入商場嘅人龍每個人真係隔住1米
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。