7月26日，天文台連續11天發出「酷熱天氣警告」，並發出特別天氣提示:「高溫天氣持續! 請補充足夠水分。如感不適，立刻休息或求助，需要時儘快求醫。」我們與熱的距離，其實非常接近，如果唔應對酷暑，會嚴重破壞身體機能。
酷熱天氣點樣影響身體?
衛生署網頁指「在酷熱天氣下，若身體不能控制體溫時，體溫會急升，排汗機能失調，身體溫度不能向下調節，便可引致中暑。如缺乏緊急治理，中暑能夠引致死亡或終身殘障。」
英國國民保健處 NHS ，則列舉了酷熱天氣對身體的六個影響:
- 酷熱天氣令身體缺水，會引發頭暈及目眩 (目眩即係眼花)
- 心跳加快，心率上升，可引發心臟病及中風
- 皮膚為了散熱而引起熱疹
- 身體為降低體溫而大量排汗，若不及時飲水，可致缺水
- 血液循環增加，可致腳腕水腫
- 導致熱痙攣、熱衰竭及中暑等致命意外
酷熱天氣之下，無論是否進行戶外活動，都會較易遇上嚴重事故。譬如話，一部無開冷氣私家車，日間車內氣溫可高達室外溫度兩倍；商業區高樓大廈阻檔空氣流動，亦令鬧市比郊外更感酷熱。至於長期病患者、長期服食藥物病友，以及孕婦、幼兒，中暑及缺水風險，會較一般人天更高。
香港有無酷熱天氣政策?
歐洲熱浪，歐盟及英國已蘊釀制訂酷熱天氣相關法例。
----- 廣告 Ad -----
對於酷熱天氣，現時政府由天文台發出「酷熱天氣警告」，呼籲市民留意天氣情況，以及作出適當準備。當局採取勸喻、提醒方式，如有市民輕視炎熱問題，往往造成意外。今年六、七月，就經常傳來行山及戶外活動中暑新聞，當中甚至有人去世。
反觀八號風球、紅雨黑雨、水浸、山泥傾瀉，政府都會因應「惡劣天氣情況」，去實行措施去保障市民安全 (如: 學生停課、僱員停工，公共交通暫停)。十號風球出街危險，咁喺氣溫高達35度之下，不少戶外工作朋友，一樣要面對惡劣情況。
其實，唔少國家及地區，都有設立「酷熱政策」，英國早前就因應炎熱天氣，而容許國民自行決定返工或返學；中國各地區亦有唔同做法嘅「高溫勞動保障」，以停工或津貼手段維護酷熱下工作嘅工人。
至於香港，如果當局更積極處理「酷熱警告」，例如採取類似颱風、紅雨黑雨等停課停工安排，就會令市民更加正視酷熱天氣，有望減少意外發生。全球氣候問題日見嚴重，呢個將會係未來必要面對嘅問題。
