近日中國媒體連番報道「體育生為減重烈日下穿羽絨服跑步」事件。河北大學生陳佳樂，報名參加省運會71公斤級摔跤比賽，不過佢仲差2公斤先達標，於是實行「地獄式減磅大法」，每日完成常規訓練後加操，喺30度高溫之下著住羽絨外套跑步。陳同學話每次跑完後，羽絨外套都可以擰出水，可見其辛苦程度。
陳佳樂最後係咪成功減磅，暫時不得而知。不過雖然有唔少網民畀佢嘅熱血打動，但有更多人對呢種「搵命搏」嘅減磅方法大為反感。事實上，「爆汗減肥」喺中國大陸並唔係新鮮事，多年前嘅「暴汗服」甚至成為潮流時尚。
「暴汗服」淘寶熱賣
暴汗服又叫「發汗服」或「桑拿服」，淘寶幾十到幾百蚊一件。呢啲「暴汗服」採用嘅質料通常係不透氣甚至防水防風嘅物料 (如 PVC 或 PU 塗層織物)，內層仲有銀膜吸熱，用家著住呢件又焗又熱嘅衫做運動，就會快速爆汗。廠商介紹話: 「暴汗服可以加速運動消耗，達到雙倍甚至三倍運動量的出汗和消耗的效果。」
有關廠商仲搵埋大陸多個 KOL 宣傳，稱「暴汗系列」已累計銷售231萬件，令呢啲「暴汗服」一下成為減肥神器。
要靚真係唔要命
稍有常識嘅人都明白，「暴汗減磅」絕對唔係有益嘅減磅方式。事實上，無論係著羽絨跑步，定係著住「暴汗服」做運動，都只能加快身體排出水份 (汗水)。雖然體重有可能快速減少，不過真正減走嘅只係水。當運動過後補充水份，體重往往回復正常。
----- 廣告 Ad -----
更嚴重就係，「暴汗服」影響身體散熱及排汗，容易導致血容量下降、心率加快、排汗率下降、散熱能力下降、體溫升高、機體電解質和酸鹼平衡紊亂，從而引致脫水，影響心臟、腎臟等器官正常運行。
早兩年，大陸就有女仔因為著住「暴汗服」做運動引發中暑，差啲連命都無埋。
老套講句，減肥同做人一樣，都係無捷徑。「暴汗服」呢類商品，真係信一次都嫌多。
