淺談飛行服務隊: 一生人只有一次免費坐直升機機會?

一眾營友為咗遠離人群，往往會選擇去偏僻的荒野甚至遙遠的島嶼，touch wood有意外時就需要召喚飛行服務隊救援，所以今次本老hike分享下關於飛行服務隊嘅事項。

分享之前想解釋一個都市傳說: 一生人只有一次免費坐直升機嘅機會?

截至2022/1/1，飛行服務隊一直都免費為市民提供服務的，絕對無咩「一生人一次免費」的情況，不過唔好因為咁而濫用服務，因為會阻延真正生命受到威脅嘅人嘅生存機會。

而飛行服務隊係隸屬保安局，一般市民要召喚飛行服務隊，只可以透過999 or 112等求助熱線，轉駁到消防，消防會因應現場環境及傷者情況而決定搵唔搵飛行服務隊幫手。所以飛行服務隊唔係想搵就搵到，隨時係消防、水警甚至係民安隊 call out 咋。

台灣的山難救援演習

以前手機未咁發達，傷者需要透過同飛行服務隊通電話黎表達自己位置、特徵等，但往往因為言語問題，令到救援遲緩，今日大多手機都有 GPS，可以透過通訊軟件定位，大大減輕飛行服務隊需要搜索地點同時間，增加救援機會。

而為飛行服務隊到達前，為咗配合佢哋救援，我哋需要:

1. 清空直升機坪

為咗直升機順利降落，必須清空直升機坪及附近嘅人同設施。

幾年前網上流傳，有人喺飛鵝山直升機坪露營。

2. 收好營具

因直升機嘅風壓係非常大，為免意外發生，必須收好營具，尤其係天幕及帳篷。

3. 配合飛行服務隊指令

需要出動飛行服務隊嘅地方，往往都未必有空地可以降落，喺依啲情況，飛行服務隊會游繩放低隊員檢查傷者情況，有需要時仲會請求其他人協助的，請大家配合。

4. 決定隨機人員

飛行服務隊係容許一名親友戚友跟隨直升機離開，但要留意，只容許「人」上機，不容許裝備上機，另外上機時有機會係無人陪同，即係直升機放繩後用電絞拉上機，膽小者不建議跟隨。

5. 填寫個人資料

直升機內係非常之嘈，要留心機組人員指示，並填妥個人資料。

6. 落機

因飛行服務隊並非醫療服務隊，落機後會交俾醫管局負責，由救護車直接送到醫院，之後程序同一般急症入院一樣。

坐直升機一啲都唔好玩，亦都唔好貪方便濫用飛行服務隊，影響真正有需要嘅人使用權利。