警方宣佈，1月15及16日 (星期六、日) 於城門水塘展開「打擊違例泊車」行動，一共發出71張告票，每張至少罰$320。
依照筆者十幾年駕車經驗，城門水塘呢類郊野地區，甚少有警察出現，只要你部車無阻到人阻到車，基本上泊到天荒地老都唔會有人理。不過由舊年開始，警方積極喺全港18區任何地方任何時間抄牌，郊野地區亦不能倖免。
近來除咗城門水塘，大帽山道亦係「重災區」。
筆者強調，違例泊車不能姑息，警方執法無可厚非。事實上，大家去郊遊都係為咗呼吸新鮮空氣，所以乘搭公共交通工具前往，以環保角度的確係較佳選擇。
----- 廣告 Ad -----
不過，筆者不吐不快嘅係，其實大多數車主「有頭髮都唔想做癩痢」，有錶位都唔會周街泊。警察落力去郊遊地點抄牌嘅同時，亦應該同時去郊外泊車咪錶，清理長期霸佔錶位嘅「死車」。 死車熱門地點包括: 清水灣二灘、北潭涌、大網仔、西沙公路、水浪窩、汀九村等……
以警方現時執法嘅頻率，大家下次郊遊都係搭車啦。
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。