最近 ViuTV 新劇《男排女將》啟播，佢參照2006年成立嘅本地球隊力臻男子排球隊，由前港隊葉鳳儀帶領之下，點樣由丙組升上甲一嘅故事。「力臻」嘅奮鬥經歷，其實係好多本地運動隊伍嘅寫照，喺場地、資金、人力物力緊絀，能夠維持正常運作已屬難能可貴，要打出好成績更係難上加難。葉鳳儀以及「力臻」隊，就締造呢個本地傳奇。
《男排女將》搵來打排球出身嘅 Stephy 鄧麗欣擔正，飾演葉鳳儀，故事講一班身材矮細嘅年輕人，喺全世界都唔睇好下，排除萬難向理想邁進。
《男排女將》劇照
力臻隊及教頭葉鳳儀
劇集未播完，係咪可以令觀眾感受到球場嘅熱血? 又係咪可以掀起本地排球熱?
飛吧!《排球少年》
----- 廣告 Ad -----
運動系日本動漫絕對係一個大題目，差唔多講得出嘅運動項目，都成為過動漫題材。單單講香港區Netflix，而家播緊嘅有: 排球 (排球少年)、籃球 (影子籃球員)、游泳 (熱血自由式)、羽毛球 (輕羽飛揚)、跑步 (強風吹拂)、單車 (飊速宅男)…… (最近仲有套筆者講唔出名嘅少女玩健身增肌減肥嘅動畫)。其中《排球少年》係各套運動動漫中嘅大熱，佢係日本《少年Jump》雜誌最受歡迎榜排行亞軍，僅次於《鬼滅之刃》。
《排球少年》講述一位身高得160公分嘅高中生日向，同佢一班隊友打出名堂嘅故事。呢套動漫同其他最大分別，就係以「現實」見稱。劇中球員無超能力，佢哋唔識得飛，更加無打爆波嘅氣力，不過佢哋以團結精神，精密頭腦，以及奮力一戰嘅氣慨，去挑戰一個又一個難關。此外，《排球少年》亦以對白富有詩意見稱，剩係睇第一季第一集第一句獨白，已經令人欲罷不能:
「擋住我前面嘅係一座高牆，牆嘅另一邊係點樣嘅風景呢? 想喺制高點之後睇風景，憑我一個人係唔得。不過，唔係得我一個嘅話……」
擋住我前面嘅係一座高牆……
「飛吧」係主角球隊烏野嘅打氣橫額，相當有詩意。
----- 廣告 Ad -----
畢竟，《男排女將》都係本地少見嘅運動系電視劇，希望可以再接再勵，就好似《排球少年》一班後生一樣，勇於嘗試，勇於挑戰!
