香港有售的 KitKat 聯乘版
食品製造商雀巢證實，旗下品牌 KitKat 遭遇重大損失。一輛運載超過41萬條、總重量達12噸的全新「一級方程式賽車 (F1)」聯名系列朱古力貨車，於歐洲運輸途中被盜。呢批貨品原定由意大利中部工廠運到波蘭，不料跨國途中失蹤，目前貨車及朱古力依然下落不明。
呢批被盜嘅朱古力極具收藏價值，係 KitKat 自2025年成為 F1 官方合作夥伴後推出首款重磅新品。該款朱古力特別設計成 F1 賽車造型，採用經典嘅威化配牛奶朱古力，外層仲包住脆米。原定喺 2026 年賽季期間同埋嚟緊嘅復活節假期大舉出貨，點知依家被劫，令到市場推廣計劃大受打擊。
----- 廣告 Ad -----
面對損失，雀巢公司於聲明中不忘幽默感，引用咗 KitKat 經典廣告口號:「我哋一直鼓勵大家『Take a Break』（抖吓啦），點知班賊將呢句話聽得太認真，直接帶埋 12 噸朱古力『走人抖吓』(Made a break with 12 tons of chocolate)。」
廠商早前製作一部1:1的朱古力F1模型
目前意大利警方已聯同供應鏈夥伴展開大規模調查。雀巢警告，呢批被盜產品極有可能流入非官方嘅黑市管道。公司強調，每一條朱古力都有專屬「批次代碼」，執法部門會利用序號追蹤產品流向。消費者如果於非正規渠道發現來源不明、價錢異常嘅 F1 聯名朱古力，就要提高警覺，避免買入贓物。
香港一出即售罄
呢款限量版 KitKat 喺香港亦相當受歡迎，有關產品於3月推出，迅即售賣一空。原價約20蚊一條嘅港版 KitKat，被炒至約50蚊。
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。