唔怕俾人鬧單車L！公路單車十大潛規則

喺未講潛規則之前，先講講明規則，因為連明規則都未知，就唔好奢望唔俾人鬧嘞。

法例規定踩單車要（會被檢控）：

1. 有單車徑時必須踩單車徑（包括對岸），無單車徑時必須踩馬路，絕不可以踩行人路，會被檢控。（唔鍾意單車踩馬路的車輛駕駛者請向政府投訴）
2. 必須安裝有效車鈴（叮叮)、車尾反光板。晚上必須有有效頭燈，尾燈。無的話又會被檢控。
3. 多人的時候，連成一直線單行駕駛，不可以平排駕駛（理論同車一樣）。
4. 不可載客。不可運載妨礙視線或妨礙平衡的貨物或動物。
5. 不可進入「快速公路」或「隧道區域」範圍內騎單車。
6. 不可攀附其他車輛。
7. 不可拖著任何物品。
8. 不可在單程路的相反方向或雙程路的右方騎單車。
9. 十一歲以下的小童在沒有成年人陪同下不可在馬路上騎單車。
10. 必須跟從車輛一樣的交通規則，停紅燈、斑馬線讓人、唔可以攝車。撞倒行人遇到意外，要停低了解和跟進，不可Hit and Run。

以上呢啲都係正式法例。

輪到公路車潛規則。

唔好停喺單車徑上面！！唔理你維修、傾電話、換片、食甜筒乜都好，唔該行上行人路！

1. 入港鐵要拆前轆，上頭尾車卡，唔係法例，係港鐵規例，唔好問我點解。我淨係知道唔做會俾人偷拍。
2. 見到其他單車友叫師兄／師姐，就算對方係你個仔。
3. 網上交收地點通常就賣家，唔可以放飛機，除非你放嘅真係飛機。
4. 唔好疊轆行，因為前面一郁左右就會同你碰撞，輕則刮花，重則炒埋一碟。加上痴到咁貼，除非條路好乾淨，如果唔係後面果個完全睇唔到前面地面有無雜物，坑渠蓋等等。
5. 唔好星期六日行大圍至大尾篤一段單車徑，因為好多租租 Adventure, 幾十蚊租部單車，同你萬幾蚊車死過，無意識左右轉、間歇性急停、高速落斜然後龜速上斜，之後喺斜頂停喺度。。。自己好自為之。
6. 馬路靠左行。超車要出聲。
7. 公路車手只要係女性，都會被自動變女神，請不要露出懷疑或不可置信的眼神。
8. 著單車褲後請檢查自己後庭，確保外觀能為人接受，沒有透視效果或扎肉。著得專業並唔代表好看。
9. 單車鎖是廢的。只要單車貴過200蚊，離開視線會即時消失。

P.S. 遇到單車阿叔大聲播放關正傑時，請表示尊重。