那年秋天，我以15萬買回我的鎖骨

進行單車活動前，請先在銀行戶口準備20萬現金待用。。。或者買保險。

剛剛嘅句子係含有威嚇成份，但買保險的部分是認真的，尤其是意外同醫療保險。

未講理論之前，我先分享一個經歷。

2014年頭小弟開始迷上公路單車，並且已經為自己訂定一次台灣環島之旅。就在旅程之前一星期，小弟如常出外練車，三五知己到大尾篤踩車之際，電光火石之間遇上突如其來的私家車從小路亂入，與我撞個正著，三個前空翻之後，我發現自己倒豎葱著地，雖然頭部有頭盔保護沒有大礙，左邊膊頭卻硬着陸。

猶如死魚攤喺地上典床典蓆，我發現我膊頭有一部分不正常凸起，同時間左臂失去活動能力。。。粗口、警察、救傷車、醫院。。。

一輪輻射之後，醫生證實我係鎖骨脫落 AC seperation, 情況比我預期中嚴重。

鎖骨脫落 AC seperation：單車手經常遇到的傷患

所謂 AC seperation 就是指鎖骨尾部連接肩胛骨之韌帶斷裂，令到原本鎖緊的鎖骨突然失去拉扯，然後彈起凸出。

那部份的鎖骨有三條韌帶連接著肩胛骨，傷患通常分五個級數。

由第三級開始，韌帶完全斷裂。

其實若果傷患屬1－3級，而你又唔介意膊頭技能外觀永遠變形，可以有權選擇唔進行手術。由得佢，然後訓練肌肉輔助失去的韌帶。。。因為果幾條韌帶唔係必須嘅，除非你係職業棒球手。

我嘅情況屬於第3.5級。加上鎖骨尾部骨折，鎖骨斷開，同埋我係處女座，所以有必要進行啲手術。

於是我就經歷咗整整四個月的休養，兩次全身麻醉手術，第一次植入鈦金屬片固定，第二次拆除，同埋取消了的台灣環島和沖繩馬拉松。。。

到咗而家，我咗邊膊頭仍然有一條深深嘅疤痕每日警醒著我要小心踩單車，同埋未來風濕的可能性。

好嘞，疤痕嘅嘢，男人來講，都幾有型，所以唔講啦。

講下錢。兩次手術加埋多謝15萬。

你可以住公共醫院，相信手術效果唔會有太大分別，但係以我經驗嚟講，個過程將會無限痛苦。

險過剃頭，因為我份意外醫療保險剛剛買咗差不多一年（在此多謝家母，係佢嘅先見之明）。如果唔係，15萬單據將會把我由貧窮線推入破產線。

呢個故事教訓我以後踩單車要打醒十二分精神，而我亦想將呢個故事同你分享，等你可以明白安全、保險嘅重要性。同埋萬一唔好彩真係遇到AC Seperation，清楚明白自己應該有什麼Option。

最後，滾動愉快。

杜光庭facebook單車專頁：滾動吧！單車日誌。