[七天單車環台遊記] Day 4 四重溪 鹿野 128KM

Day 4 四重溪 → 鹿野 128KM

今日終於挑戰傳說中嘅壽卡，個elevation profile 就係咁嘅：

即係20公里內上466.5米！聽落好難，驚到我哋都唔想出發。最後歎個靚早餐，hea到10點先出發！

其實原來都唔係好難啫，一邊踩一邊睇下風景，keep住爬坡的節奏，慢慢踩下兩粒鐘鬆d就到頂喇！

壽卡感覺比繁忙的台9線要容易(旅遊巴司機都是不要命的)，因為由車城上壽卡基本上冇咩車行，兩個人可以霸住成條線慢慢上。途中遇見不少人環島，上壽卡期間更遇上香港人！可惜沒有怎樣聊天(大概大家爬坡時都寧願把時間花在呼吸上)，希望佢哋順順利利吧！

Yeah!! 終於上到山頂喇！唔少得要同壽卡鐵馬驛站影相啦！影夠相之後就衝落去喇! 其實落斜比上斜條路更加斜，所以落長斜比想像中辛苦，剎車剎到手掌酸軟。而落斜時見到有不少人騎車上山，我們都會大叫加油，以示鼓勵。不過見到其中一個在爬坡初段已在推車，我很想跟他説：後面還有10km，回頭是岸啊… 用咗兩個鐘上嘅頂，10分鐘就衝返落去喇!

落斜後入小7休息，食個炸豬排飯，有個伯伯問 Michael：「你晚上睡得著嗎?」Michael 瞬間以為自己做了咩虧心事，原來佢係指曬傷會不會好痛…

台東沿岸風景不比屏東遜色，道路平坦而且車輛數目更少！遠眺一望無際嘅大海，真係好治癒。
下午途經一個廢棄咗嘅多良車站，依家成為一個旅遊景點，唔少人喺度一邊睇風景，一邊等火車經過。去到台東市之後交通開始繁忙，台東的旅遊巴司機很惡，總是駛得很近(明明有兩條線)，引致大家狀態長期繃緊。其中一次更差點被爬頭的旅遊巴夾扁，幸好大步檻過。最後就去到鹿野搵間溫泉民宿享受下。今日總共踩咗128公里。