德國有個小鎮叫弗賴辛 (Freising)，座落於慕尼黑東北方35公里，人口只得40,000人。大家未聽過呢個地方一啲都唔出奇，不過最近佢就因為一條500米長嘅單車徑 (上圖)，令市長一夜成名。
呢條起到波浪咁嘅單車徑，其實係一個工程嘅失誤。早前呢一段道路進行翻新工程，不過起好馬路，起埋行人道之後，市政府先發現無留位起單車徑。於是，佢哋唯有向路旁伸延，將單車徑起喺路邊。但因為路邊係河床，亦有唔少農田用嘅灌溉系統，為咗唔影響呢啲設施以及控制工程費用，就要將單車徑起成波浪一樣。
----- 廣告 Ad -----
不過，單車徑通車之後，當地居民非但無不滿，而且非常受落。有市民話喺上面踩單車完全無問題，仲支持政府為咗保護農業設施而將條路起到咁。
居民話好鍾意條單車徑
至於當地市長 Uwe Gerlsbeck，亦因為咁有「創意」以及可以為政府慳到錢，備受公眾關注。市長話，自從呢條單車徑起好之後，佢每日都收到來自四面八方邀請訪問，為咗唔打擾日常工作，佢已經拒絕晒所有人。
市長向公眾強調，呢條路只係望落去有啲怪，到附近嘅花草重新生長之後，一定會令大家心曠神怡!
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。