「新界單車徑網絡」全線60公里，多位屯門區議員早前實地測試，由上水踩入屯門，原本計劃用3個鐘完成20公里，最後踩咗5個幾鐘共40公里。踩完之後，佢哋一致認為須解決四大缺失:
1. 單車徑斷橛禾蟲
除咗河上鄉至古洞、米埔至錦綉、兆康至湖山公園路段比較順暢外，其他路段好多都係「斷橛禾蟲」。例如古洞至新田一段，雖然只係幾公里路程，但單車徑就被分割成廿幾段，中間經過唔少紅綠燈路口、貨櫃場、地盤出入口等，好多時都要推車橫過，減低樂趣。另外，到達元朗市中心時，有一段單車徑更因為附近大型工程，導致一大段單車徑臨時封閉，需要兜大彎。
2. 陷阱處處，易生意外
有部份單車徑比較窄，路段駁口位高低不平，而路口嘅防撞膠柱又密又多，經驗不足嘅單車友，容易發生意外。加上有啲路段，例如錦綉花園對出過路處，不時有大貨櫃車、泥頭車進出，車友橫過馬路時一定要加倍小心，推車橫過。
3. 指示不清
上水至天水圍一段路，沿途缺乏清晰路牌或地圖指引。區議員需要沿途問人，兜咗唔少冤枉路。
----- 廣告 Ad -----
4. 屯門匯合中心設施簡陋
屯門匯合中心
位於兆康嘅「屯門單車匯合中心」，同天水圍匯合中心相比，顯得相當簡陋: 缺乏單車租還、小食亭無開 (但有汽水機)。
以下係屯門兆禧區議員甄紹南原post:
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。