倫敦以單車代步嘅單車友多達60萬，26同46爭路嘅情況成日都見到。
近十年嚟，英國嘅單車友數字以大幅提升。單計倫敦，2004年至2014年以單車代步嘅市民 (每日都踩單車)，由38萬升至61萬。政府除咗喺繁忙地區增設單車行車線外，亦要喺法例諗多啲辦法，以減少日益增加嘅單車友車禍。
喺最近，英國運輸署 (Department of Transport) 研究借鏡澳洲，訂立機動車 (motor)同單車嘅安全距離。機動車如果同單車「跟車太貼」，就會違反法例。初步建議，違反呢個規訂，機動車司機會罰款5000英鎊，約5萬6千港幣。
以現行法例，喺倫敦市內違泊，最高都只係罰130鎊。咁跟單車太貼，竟然會被罰5000鎊？睇怕啲私家車車主，聽到一定嘩嘩聲！
----- 廣告 Ad -----
另一個富爭議嘅地方，就係私家車要預留幾遠畀單車友呢？英國運輸署暫時建議，安全距離至少要有1米，即係3英呎！
咁單車攝車罅又點計？
單車友聽到呢啲消息，就梗係拍爛手掌。不過大家都明白，香港始終唔係西方社會，大多數人都唔接受單車係交通工具。好似有香港職業車司機就揚言，以香港嘅情況，喺繁忙街道如果私家車同前車留成幾呎距離，唔係畀後車著高燈推爆你，就係不斷畀人cut線打尖。簡直係交通擁塞嘅元兇！
其實，法例點寫未必係最重要，私家車同單車可以和平喺馬路共存，先係大家最樂於看見！
資料來源：Daily Mail、City of London
更多:
Fitz.hk Facebook專頁
屯門至馬鞍山 2020年踩單車直達
[碟煞係最強兵器? ] 車手重傷 公路車全面禁用
Fitz Cycling 單車
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。