呢兩日，單車友睇新聞嘅時候唔爆粗，一係好好修養，一係已經麻木。
先有「香港單車節」公佈參加詳情。一項唔計排名，講到明係悠遊嘅單車活動，竟然要求技術評術好似考電單車牌咁，要窄路掉頭，仲要計速度，而屬會成員就可以豁免評核。即係話，呢個活動又淪為某些屬會嘅小圈子活動，佢哋可以唔使評核，仲可以優先報名。我哋呢啲平民百姓，想話喺鬧市踩車，唯有要等政府起好條單車徑先啦。(見《[疑似係伏] 參加單車節 請你先接受評核》)
但係之後，立法會議員葉劉淑儀，反對興建單車徑之餘，仲出言不遜。佢話：
「其實現在香港的潮流呢，是很流行跨境的單車運動……經羅湖或者沙頭角，一直兩晚踩過大小梅沙，住百零蚊日的客棧，長周末咁去旅遊，而且那些真正愛好單車活動的人，他們鍾意較有挑戰的，就是大帽山那些、上斜的那些、風景漂亮的那些，你們的項目（指在香港興建單車徑）是否有些過時？……花那麼多錢，漂亮的地方又去不得，環保諮詢委員會又反對，不如促進市民去內地踩仲好。」來源：《立場新聞》
(立場新聞製圖)
吓！咁講都得？市民鍾意一項活動，政府係咪應該喺設施上作出配合，而唔係叫人返大陸玩？！用佢嘅邏輯，即係話：
----- 廣告 Ad -----
- 大家唔好去郊野公園行山，啲地用嚟起樓賺錢啦，要行山唔該返大陸；
- 大家唔好跑馬拉松，要封路會搞到交通擠塞，想跑步就報名去參加北京馬拉松啦。(一項可能要戴口罩出賽嘅比賽)
我只係想講，阿葉劉你都係唔適宜喺香港呼吸，你都係返大陸先呼吸啦。更何況，踩單車並非完全係運動、消閒活動，單車係實實在在用嚟代步嘅交通工具呀！
單車友同司機經常有爭拗
唉，呻完一輪，心情仲未平伏。又睇到《立場新聞》一篇文章叫《踩車？討厭！》，作者許迅，一連串嘅申訴，摘錄如下：
「清晨在馬路操練，對面行車線二噸半貨車司機會問候你家人；
在單車徑上鬆腳，狗主和大媽會阻止你；
在行人路上慢騎，差人會招呼你；
在科學園賽三鐵，豪宅業主會投訴你;
在地鐡內沒有拆除前輪，單車車友會開Facebook轟你…
甚至意外身亡，法官會說穿深色衣服踩車不智！
再問身邊不踩車的朋友：
馬路真的只屬於車輛？大部分答不；
單車徑應用來跳舞和放狗？大部分答不；
在行人路上騎單車危險，或是馬路上危險？大部分答馬路；
在科學園騎單車製造出來的聲浪大，還是泥頭車及貨車的聲浪大？大部分答不會是單車；
單車拆輪是否可避免危險？大部分也答不。」
我完全感受到單車友嘅無奈與騎在單車上嘅精神壓力，而最令我憤既嘅地方，就係社會人士只著眼自己嘅利益，而唔顧及其他人嘅需要。葉劉叫人返大陸踩車，同馬路上嘅貨車司機叫單車友死開一樣，大家同樣涼薄；而「單車節」要參加者去評核，亦同拎部拆碌車上地鐵，畀人話危險一樣，大家都係咁無知。
----- 廣告 Ad -----
香港係我哋屋企，點解我哋唔可以喺呢度踩單車呢？點解我哋踩單車要受到歧視、壓迫？
更多:
[疑似係伏] 參加單車節 請你先接受評核
[香港單車節] 鬧市踩車 機會難得
[擁抱路權] 單車絕對不讓私家車的原因!
[側邊係單車徑] 三鐵賽無得踩單車
Fitz Cycling 單車
