話說公司有個環保政策係搞活動唔俾派樽裝水，同事就好「聰明」咁諗到派紙包飲品代替 (我稱之為「一秒激死環保L事件」)，驚覺原來好多人都唔了解點解要環保，點解要減廢；作為半個靠海搵食，鍾意潛水多過行街嘅人，好想同大家講: 膠污染係現時海洋面對最大嘅問題之一，請大家日常生活「膠」少陣。
網絡圖片：A Plastic Ocean
首先，大家要知道一樣野: 件垃圾掉咗入垃圾筒之後佢喺你視線範圍消失咗，唔代表件垃圾喺地球上消失咗。香港依家絕大部份嘅垃圾都係車去就黎滿嘅堆田區 (土地問題唔係度討論)，少部份會拎去回收；無論件垃圾最後去邊，中途梗有啲係落咗海，特別係膠袋/膠樽/飲管呢啲一次性用幾分鐘就掉嘅膠製品，因為又輕又細件，大風少少就吹走。想像下成架貨船裝滿晒膠樽同膠袋，只要吹走0.1%落海，果度已經夠塞爆你同我住緊個蝸居。
咁舊膠落咗海會點?
1. 膠係好難分解嘅物料，好多時我地以為佢已經被分解，其實係變到越黎越碎越黎越細粒，但細粒唔代表消失，反而係會更容易滲入食物鏈/水源，最後入咗我地個肚。如果大家屋企有放咗幾年冇用過嘅膠袋，你只要用少少力摸落去個袋已經會碎晒；如果你唔掃走啲碎，繼續由佢係度，幾十年後肉眼睇上去個膠袋好似消失咗，但其實係佢已經變好細塊，飄到你成屋都係。
----- 廣告 Ad -----
2. 海洋生物會成個膠袋食咗落肚，然後塞住晒個腸胃食唔到其他野餓死。大家可能會覺得佢地食膠袋好蠢，但其實係水入面睇膠袋同水母個樣有80%似 (我都試過認錯膠袋係水母)，而水母 (宜家變咗膠袋) 係海洋生物好常食嘅食物。
(網絡圖片: One Green Planet, 左邊係膠袋，右邊係水母）
3. 唔知大家有冇睇過條片係隻海龜個鼻哥窿俾條飲管塞住咗 (未睇過嘅可以睇下，但真係睇到都覺得痛):
可能大家會覺得呢個只係單一事件，唔係隻隻海龜都咁唔好彩會俾枝飲管塞住個鼻哥窿，但諗下平時我地用枝飲管只係用幾分鐘就飲完杯野，枝管最後就塞咗喺隻海龜度唔知幾耐先有人同佢抆番出黎……
好喇，講完一大輪膠有幾唔好，到底可以點搞先？叫大家唔好用膠有啲不切實際，不過可以從小事著手，做得幾多得幾多:
1. 盡量少用飲管，我知去茶餐廳嗌凍飲同人講「走飲管」嘅成功率好低（特別係繁忙時間要求多多分分鐘俾人問候），但起碼去便利店買野飲時唔好用飲管，真係連飲罐/枝汽水都要用管的話麻煩自己買枝可再用嘅玻璃/金屬飲管隨身帶出街用。
（網絡圖片：Sott.net）
----- 廣告 Ad -----
2. 除非自備容器同餐具，否則減少買外賣。好多人都會朝早/lunch係茶餐廳/快餐店買野返公司食，但麻煩大家數下你每買一次外賣製造咗幾多件垃圾？早餐：裝麵個碗同蓋、裝煎蛋多士個盒、飲品個杯、餐具、膠袋；lunch: 飯盒、湯碗、飲品杯、餐具、膠袋。好似唔係好多? 請你試下連續一星期將自己食完外賣嘅垃圾洗乾淨儲喺自己個位，睇下你到星期五仲有冇位做野。
3. 經常買麵包嘅朋友強烈推薦大家用環保麵包袋/布，方便、好用、易清潔；雖然個袋/布本身都係用膠造但係一塊可以用一年以上，之後可以要黎做遮套/食飯檯墊。順帶一提用環保麵包袋/布的話就唔好去連鎖麵包舖買空氣麵包，因為啲包已經用膠袋一個個包起晒根本環保唔到。
網絡圖片：Roll’eat
4. 遮袋用多幾次先好掉，或者乾脆唔用/自備膠袋做遮袋。每次出入室內地方都拎一個遮袋的話出一日街閒閒地用五、六個遮袋，香港七百萬人落一日雨就用咗三千五百萬個袋，落足一星期雨個話條數請自己計……
（網絡圖片：Eco-Greenery Facebook）
5. 紙杯好難回收，跑步嘅朋友比賽時可以自備摺杯，我知聽落好痴線，比賽衝PB點可能拎住隻杯跑!? 宜家市面上已經有超輕摺埋超細嘅杯，就算跑褲無袋都可以「攝」喺褲頭，方便程度同去水站拎杯水飲完再掉咗隻杯差唔多，可能工作人員幫你裝滿隻杯係要用多你3-4秒時間；但如果你唔係快到果幾秒會 make a difference 嘅精英級跑手，多幾秒會有幾大分別? 況且，大家比賽時去到水站附近突然一地都係紙杯唔覺得好煩個咩？好多人跑季幾乎個個星期都有比賽，每次隻杯俾你用幾秒就變垃圾，一個跑季製造嘅垃圾量會嚇死人。
（網絡圖片：綠惜地球）
6. 唔好 (濫) 用退熱貼。退熱貼本身已經好唔環保，唔知邊個仲要好聰明咁發現佢係夏天消暑良品，結果宜家夏天去行山成日見到有人成痴到成身都係退熱貼。夏天行山請預咗辛苦，怕辛苦就留番喺屋企/商場，再唔係去健身室涼住冷氣做運動。行山環保嘅散熱方法係用冰感毛巾，或者前一晚將成枝水放入冰格，行山時攝係背脊同背囊中間，枝冰溶咗你仲有凍水飲。
勿以善少而不為，用少幾個膠袋幾枝飲管好似好少好濕碎咁，但每人行多一小步就會有大改變，每人每日用少一個袋一枝飲管，個影響就好大。
最後想講句，we need nature but nature doesn’t need us，人類冇咗大自然就會滅亡，但大自然冇咗人類只會生存得更好。
----- 廣告 Ad -----
（網絡圖片：National Geographic）
編按: 最近，泰國有一條領航鯨死亡，解剖後發現胃裏有多達17磅的塑膠。 (片段: National Geographic) 塑膠的污染，已危害海洋生物了。
Fitz 連結: https://fitz.hk/?p=96523
更多：
Fitz Facebook專頁
[自由潛水] 自由潛水世界紀錄 (深度)
[自由潛水] 閉氣潛水係人類本能?
[自由潛水] 發揮人類潛能
Fitz Diving 潛水
