[自由潛水] 自由潛水世界紀錄 (泳池項目篇)

自由潛水固之然係一項好有深度嘅運動，上次介紹咗三項深潛比賽項目 (即係用唔同方法鬥潛得深)，其實仲有三個泳池項目：

Static (STA) 

好多人一聽到自由潛水可以潛到過百米，閉氣十分鐘就會以為運動員會用十分鐘潛落一百米，其實冇可能，就好似短跑運動員唔能夠用佢衝一百米嘅速度去跑馬拉松一樣。

閉氣係一個獨立項目，通常運動員會面向下浮喺水面進行閉氣，因為身體喺靜止狀態下耗氧量最少，閉氣時間最耐。呢個項目基本上對體能係零要求，考驗嘅係思想上嘅放鬆，因為腦部會消耗身體兩成氧氣；而我地緊張時肌肉會收縮繃緊，消耗更多氧氣。簡單咁講閉氣時間耐嘅人都識得將身體同個腦進入「休眠狀態」。

雖然係泳池項目，但都可以喺淺水嘅海洋環境度進行。

世界紀錄：(紀錄保持者，國籍)

• 男：11:35 min (Stéphane MIFSUD，法國)
• 女：09:02 min (Natalia MOLCHANOVA，俄羅斯)

＊健力士世界紀錄嘅閉氣世界紀錄係24分鐘，因為參加者閉氣前會吸純氧，而自由潛水嘅紀錄只係呼吸一般空氣。

Dynamic with Fins (DYN)

用蛙鞋喺水底鬥游得遠，同深度項目一樣參加者可以選擇用單蹼(monofin)或者雙蹼(bifin)，但單蹼比較有效率所以較為多人用。呢個項目比賽時一般會喺50米泳池度進行。

世界紀錄：(紀錄保持者，國籍)

• 男：
  • 300m (Mateusz MALINA，波蘭）
  • 300m (Giorgos PANAGIOTAKIS，希臘）
• 女：237m (Natalia MOLCHANOVA，俄羅斯）

Dynamic without Fins (DNF)

唔用任何推進輔助喺水底鬥游得遠，其實規則冇寫明要用咩泳式同動作，不過一直以黎大家都係用改良蛙式去游。呢個項目比賽時通常會喺25米泳池度進行。

世界紀錄：(紀錄保持者，國籍)

• 男：244m (Mateusz MALINA，波蘭)
• 女：191m (Magdalena SOLICH-TALANDA ，波蘭)

泳池項目係真正嘅意志力考驗，當閉氣一段時間之後身體會有唔同嘅信號去話你知好想呼吸，運動員會知道自己嘅身體幾時係「想要」，幾時係「需要」，明明只要向上游兩米就有新鮮空氣，但仍然留喺水底堅持；就好似玩毅行者行到去到六十公里又攰又餓又眼訓時經過屋企樓下咁。

閉氣可以超過十分鐘固之然係好勁，但最誇張係唔用蛙鞋都可以喺水底游到二百幾米，以五十米泳池黎講即係一口氣喺水底游成五個池!

Holos Freediving Facebook專頁