古代男人要狩獵，回家已很累。Enoch (左) 和 Laurence不用狩獵，但仍要整攰自己才肯回家，做男人真辛苦
(唔好意思又四千字，如果趕時間，碌去文章末看「後記」吧，大男人的小故事，含深層意義。)
做男人，有好多出事位，因為要man，被期望出頭保護身邊人(客服界的研究指出，當身邊有女人時，男性就會變西客)、去爭勝、解決困難、換蒸餾水/車呔、救電腦，汽車死火一定要第一時間揭起車頭蓋 (其實腦裡一片空白)、去創業、冒險、挑戰極限運動 (因為有好多女人會尖叫：嘩，痴線㗎，咁都得嘅)….，所以男人的平均壽命短過女人、男性自殺數字持續高於女性等現象，是有原因的。
成件事，背後是睪固酮 (Testosterone) 作怪，有生物基礎。所以唔好怪責男人 (但為自己幸福，一定要幫佢買份保險)。
----- 廣告 Ad -----
近年爆紅的 Hyrox (2017才在德國開展)，比賽場內滿佈 gym 房刑具，爆肌男走來走去，舉上舉落。看菜單內容，挑機人類極限，絕不友善，仲有成棚人係旁喝采拍照，好有 Physical 100 真人秀的氛圍，又係男人換衫出場的時候。
Hyrox小百科
做每一關卡前皆需繞圈跑1K，分別共跑8K，是典型的crossfit運動
Hyrox 結合了路跑和體能的綜合競技，包含8種功能性的動作關卡 Circuit，做每一關卡前皆需繞圈跑1K，共跑8K，是典型的 crossfit 運動。過程要求有爆發力、耐力和心肺功能等。勝負計算完成所有項目的總時間。關卡包括：
- 滑雪機 (Ski Erg) 1000 米
- 雪撬推進 (Sled Push) 50米 負重150公斤
- 負重繩索拖拉 (Sled Pull) 50米 負重103公斤
- 波比蛙跳 (Burpee Broad Jump) 80米
- 划船機 (Row Erg) 1000米
- 壺鈴農夫走路 (Farmers Carry) 200米 24公斤x2
- 沙袋負重弓箭步 (Lunges) 100米 20公斤
- 藥球擲扔 (Wall Balls) 100次 6公斤
背著20公斤沙袋弓箭步走100米，應該係殺人犯嘅下場
整個過程在室內舉行，選手、裁判、工作人員、應援團、觀眾緊密地聚集一起，打氣、尖叫、掌聲，有肌肉男、有健美女，有MC、有勝利、有挫折，就在眼前發生。混和汗水、痛楚、掙扎、堅持，在場館中迴盪游走，加上火辣的音樂、燈效、場地佈置，充滿官能刺激的真人秀。明顯是文化什麼盛事基金睇漏眼的例子。
短片：詳細介紹 Hyrox 玩法，亦見到現場氣氛 (2024 Hyrox香港站)
----- 廣告 Ad -----
(冷知識：Hyrox 分 Open 及 Pro 兩個級別 (另有二人和四人隊際，及年齡組別，10歲一組，最大是90+)，所有項目相同，但 Pro 的負重量加大。官網說參賽者平均 1.5小時完賽 (沒有cut off time)，pro的世界排名男子前十名是53-55分鐘之間。)
對於新鮮事物，香港從不遲到，近年本土 Hyrox 運動員增長迅速，成績在國際舞台冒升。機緣巧合，其中兩位頂流的是我跑班同學 Laurence 和 Enoch。兩位肌肉男一出場，不用著細碼衫，已令女士尖叫男士閃開。
Laurence(左)大隻得嚟溫文儒雅，Enoch爆肌得嚟陽光純真，由少女到嬸嬸，全殺 (我就係咁膚淺)
Laurence 十分低調，不開聲時似 好cool 的大學教授 (應該研究希臘神話)，有點冷，但相處10分鐘，即感到那份濃濃的暖男溫度和儒雅，gentle到。Enoch 簡直是從日本動漫走出來的男兒當入樽，說話和身體語言就是力，爽、man、巴打hood，一地都係。
Enoch動漫版
難得兩位型男攜同另一半出席，與他們一起，除了有滿滿的安全感，還有好迫的感覺。(極罕有，兩個巴打同時有著上衣)
Laurence：Hyrox 能讓身邊的人站在身邊
「你哋如何踏上大隻佬之路?」
Laurence 先講:「我有小朋友之後冇做運動，阿媽都話我肥，35歲收到份生日禮物，一位做 personal trainer 嘅街坊送了個 training course 俾我，於是決心做運動減肥。一路在家中添置健身器材，從此未停過。」
那時 Laurence 住在長沙5、6年 (不是長沙灣，是大嶼山的長沙，即係可以開拍 Cast Away)，他說那時新的東涌道剛通車，每天駕車返工，見到不認識的居民在等巴士，會主動叫他們上車順道一起出東涌。可見他流著暖男的血液。
「玩左一段時間，係 IG 見到韓國嘅肌肉男，覺得幾型，練大隻可以自 high。若只做 gym，缺乏 cardio training，不是太健康，於是開始跑步。後來加入現時的跑會操心肺。」Laurence 爆短途在班中是頂流，後來更被教練 KFC 推入越野跑火坑，都話要小心交朋友。
----- 廣告 Ad -----
「2022年11月我參加了香港第一屆 Hyrox，覺得好新鮮好好玩。」從此不能回頭。
「Hyrox 帶俾我成功感，特別見到自己進步，有動力繼續。我第一場時間係1小時11分，去年在香港那場是1小時03分鐘，好鼓舞。不過上年新加坡站第一次玩 Pro，大腿受傷加上實在太熱，好地獄。時間約1:15，我哋 target 係1:10以下。」退一步，會進番三步，只要你唔 quit。
「整個過程包括跑步，都在室內進行，supporter 可以係隔離打氣，大聲嗌，好有氣氛。山賽只係起點同終點至見到同學仔，過程靜太多。」好多時終點都唔一定見到，慢腳會明。
Hyrox比賽過程，能讓身邊的人真正站在身邊
「有時我完左我個組別嘅比賽，會留低 support 另一個 category 嘅同學仔，在固定場地比賽，可以 involve 好多人一齊參與。」
作為最親密的戰友 Enoch 太太 Carina 和 Laurence 女友 Keris，都說每次見他們完成了一個關卡，要計畫最快的路線去下一個，又要計算下他們會進入關卡的那個位置，俾補給、打氣、拍照、提點形勢等，已當自己是賽事一部份，緊張過參賽者。
讓男人專注向前盡拼，不是前面的女人，而是站在背後的女人
Hyrox 就是可以讓身邊的人在比賽時站在身邊，「佢哋真係俾到好多 energy 我哋。」Laurence 和 Enoch都對她們送上心心眼，相信今餐不用 order 甜品了。
Enoch: Hyrox 定義 Man
「我三年班時 (約7歲) 已過左加拿大 (Enoch操流利廣東話，但唔識睇中文字)，以前主要打籃球，後來養成跑步習慣，每日都要跑，唔流過汗唔舒服。回港後幫父親打理家族生意，經常要返內地。Covid 期間全停，唔洗點做，我突然多左好多時間，係我人生最開心嘅時候。」希望世伯睇唔到呢句。
Enoch 身邊好多人都話佢瘦，包括他的哥哥 (做PT)、KFC 教練 (他們是加拿大的大學同學，Enoch 修 Biochemistry，KFC 讀精算)，和最重要的是 Carina:「我識佢果時已經好奀。」竟然用奀來形容Enoch，令人難以致信。
又唔係話好奀，有少少營養不良咁囉
----- 廣告 Ad -----
「於是我開始舉鐵增肌。」
「練成一身肌肉對你有乜嘢意義？」
「我想 be the best version of myself。另外亦係一個俾自己嘅 challenge，得到人哋認同我嘅成果同 hardworking，會提升自信。A good shape 能夠話俾人知我係有 discipline 嘅人，背後代表一份commitment 同努力。」
點解可以變成咁？係 commitment 呀
「我而家都算係一個老板仔，都想同事出嚟係 presentable，如果個伙記連自己都照顧得唔好，會俾人懷疑佢嘅工作態度。」好彩我現在不用上班，否則我中間肥大的身型就會俾方丈誤以為我係hea 霸。
Hyrox 初邂逅
「現時主辦 Asia Pacific 嘅 Hyrox 負責人，是之前 Spartan 搞手，我有個玩開 Spartan 嘅 friend，推介我玩第二屆香港站嘅 Hyrox。開頭見到啲 circuit又推又拉，仲要100下 wall ball，覺得好癲。」Enoch 這次處男下海，時間1:10，成績不俗。
「我好記得係 tunnel 等出場時，雙腳在打震，十分緊張，之前一晚瞓唔到覺。」到了這把年紀，還有「遙遙共她見一面，那份快樂太新鮮」的初戀感覺，確會令人，特別男人，一夜失眠。
「八個關卡，你哋覺得最難係邊個？」
Laurence 先說:「我覺得係Sled Pull負重繩索拖拉，因為我唔夠高，個人挨後時起唔到槓桿效果，呢個項目鬼佬有優勢。」
Enoch 沉思了半秒想回答之際，眾人隨即一齊起哄:「wall ball囉!」好似講到東張西望都有報導過咁。
「以前比賽時 wall ball 項目可以用粉，但而家唔可以，記得舊年10月在韓國第一次玩 Hyrox pro，我冇戴手套玩 wall ball，個波跣得好厲害，足足用左10分鐘至完成，一般選手約6分鐘，我同 Laurence 約5分半。浪費左好多時間。果場我只能造1:12，賽前諗住1:10內。」Enoch 一臉失望。不過不久之後的北京 Hyrox，兩巴打組 team 玩 doubles pro，Enoch 已抹去此陰影面積，造出00:58:52，勇奪組別冠軍 (全場亞軍)。
叻啦叻啦
光輝的一頁，一切的辛酸、痛楚和犧牲，都得到回報
Sled Pull 是 Laurence的最大挑戰，有冇少少想同佢抹汗嘅衝動
遇上體能之巔的洪隊長
去年11月在香港亞博館舉行了盛大的 Hyrox 精英賽 (全是Open組別)，焦點是 Physical 100《體能之巔：百人大挑戰2》的亞軍韓國精英洪範石也參加，他早前在台北站及首爾站奪得 Pro Doubles 第一名。Laurence 和 Enoch 有幸遇上洪隊長，當然力併。結果洪隊長1:02:02完成，總排名第6，Enoch 是 1:02:19，以17秒之差排名第10，Laurence 是 1:04:30，排名18。(是站總冠軍是英國選手00:59:24，香港最佳成績是Roy Ng 1:01:53，排名第5)
仁川的比賽，Enoch說有機會站在兩位亞洲精英旁邊，韓國的洪範石和日本的Daisuke Sekiyoshi，已是一份光榮和肯定
剛過去的5月在韓國仁川，Enoch 原本與 Laurence 組隊參加 Doubles Pro，奈何 Laurence 傷腳，Enoch 改玩單人 Pro，他以1:07為目標，萬分緊張，還買了新手套，於 sled pull 和 wall ball 項目使用。怎知愈緊張愈易出錯。在第跑二個1K圈時，竟然發台瘟跑多了一圈。
「成個 race 我都俾呢個意外分了心，擔心造唔到好成績。」
「新手套係玩 sled pull 時十分合適，但到左wall ball卻出事，超跣，頭4下都唔合規格，要重做。呢次又要10分鐘才完成。結果造出歷來最差的 Hyrox 時間1:14。」
又係wall ball出事，造出歷來最差的時間，好大的陰影面積
「好sad 好sad 好sad(原來好sad嘅嘢都係要講3次)，我好唔想見到個大 screen show 我嘅成績出嚟，覺得好核突。」Enoch 你要勇敢面對，需知任何事情，無論是美好或醜陋，只要對得夠耐，就會變質。
「At wallball I went to a dark hole but still fight through and even though there’s no miracle in the world, as the score screen shows me my worse time, life sometimes reward those who continue to fight and that podium was that extra reward to keep me going!」每次經歷的失敗，總是向前的動力，只要 keep on fighting。
由nobody成為港隊代表
Enoch 早前被委任一項令他心跳加速的任務，就是被籌辦香港 Hyrox 的機構邀請他代表香港出戰6月尾新加坡站的 Hyrox，會組成兩男兩女的接力隊，此次全是亞洲國家參與。由於前隊長不能前往，Enoch 便會成為 captain，並負責挑選隊員。他當然第一時間加入打死不離好巴打的 Laurence，另與兩位女隊員 Claire 和 Vivian 一齊穿起港隊戰衣與其國家決戰光明頂。希望大家到時隔住個 mon 給他們打氣給力。
HKG三個字母的含金量很重，背後祝願他們打出漂亮的一仗，Enoch記得換手套
Laurence 說:「香港的 Hyrox 水平在亞洲只是中游位置，韓國日本是強國，內地和泰國都不俗。其實香港 Hyrox 起步不算遲，不過玩 crossfit 嘅人唔多，帶動不起來。」
「睇番世界排名成績，頭20中好多都係 personal trainer，佢咃全時間操，自然好大優勢。」
「韓國的頂尖 Hyrox 運動員可以是全職，有商業贊助。佢哋嘅生命就係 Hyrox。」當用生命成就一項事情，那項事情也會反過來成就生命。
後記
Enoch 和 Laurence 都是處事認真和高度投入的人，兩個人在訪問後都分別私訊我，補充一些之前沒有表達但十分重要的故事和感覺。訪問期間好感到兩位肌肉男的另一半 Carina 和 Keris，十分支持身邊人在 Hyrox 實現自己，感激她們的出席。
Carina 說 Enoch 自小很多事情都由屋企安排妥當，包括學業和事業，順風順水。現在玩 Hyrox，好感覺由自己做決定，前面的路用自己的身體、頭腦和意志開展，再不是繼承父業，由玩 Open 到 Pro，由貪高興玩玩下，到代表香港出戰其他國家，標示自己努力克服困難的成果，成與敗只是其次。Hyrox 給予 Enoch 更深層意義。
Enoch 在訪問後 msg 我，關於Hyrox，他說的其實是:「Hyrox is a sport that will make you go through different emotions, wins and loss but at the end if you put your best efforts, there’s no loss.」
成與敗，得與失，要多少經歷才能看透
訪問時我問過 Laurence 有關 Hyrox 對他的意義，數天後 Laurence 私訊我，道出一段難忘的經歷:「疫情期間，母親不幸離世，與太太離婚，又與當時的女友分手，這三位在我生命裡最重要嘅女人，在十分短時間內相繼離去。那段日子十分艱難困擾。於是我去跑步、拚命跑、忘情跑，跑步時可以逃避一下，不用面對。我跑得好快，落街跑10K，可以是40分頭。」運動是最佳的避風港，因為連思念和傷悲的力也被淘盡。
「後來開始玩 Hyrox，現時的女友 Keris 必到場支援，每次跑經她身旁，聽到她大嗌加油，無論那時有多攰多辛苦，我堅會跑得特別快。記得有次去澳洲 Perth 參加 Hyrox，(Laurence兩個仔住在那裡，他們是混血兒)，大仔 Lucas 來 support，佢全場未停過嗌，之後更失左聲。果場我雖然係負傷，仍得到 age cat 冠軍。佢哋對我嘅支持係超級重要。」
Lucas 回港渡假，跟爸爸一齊跑10K去奧海城，Laurence 又 charge 滿電
「我去跑步同比賽，並唔係想係 social media 呃like，呢啲我完全唔care，重要係對自己同身邊最 close 嘅人一個交代，因為佢哋實在付出左好多精力和時間，我唔可以隨便 quit 同 hea 做。我覺得比賽中有佢哋一齊，比賽先至有意思。」只有你的歡顏 笑語，伴我在漫漫長途有所依。
「阿孫你都試下啦，好好玩㗎，你係age cat好易攞獎!」Laurence 每次見到我都想推我入火坑，但我不為所動，因為於我「讓我靜靜地渡過餘生」的信念十分頑強。
拼盡，無悔！
