Mirror之外男人頭號大敵: 肥仔波

Mirror部份成員

話說男團 Mirror 搞到唔少香港夫妻嘅關係緊張，Facebook群組 我老婆嫁左比Mirror導致婚姻破裂關注組 幾日招收咗廿萬成員。群組之中有人自爆，話鏡粉老婆強逼老公增肌減磅。

中年人無論因為老婆因為偶像，甚至因為老婆嘅偶像而修身減磅，都應該值得嘉許。不過唔少打算練大隻嘅中年男人，都遇到頭號敵人，就係胸頭兩團俗稱為「肥仔波」嘅脂肪。

「肥仔波」與內分泌

「肥仔波」醫學上稱為 gynaecomastia，俗稱 man boobs，中文係「男性乳房發育症」。「肥仔波」指男性的乳房腫脹並變得比正常情況下更大，主要成因係男性體內嘅睾丸素下降，或雌激素上升，引致出現女性性徵。而男性出現呢種內分泌問題嘅原因，大致分為3項:

1. 體脂問題

不良飲食以及飲酒習慣，令身體脂肪積聚。多餘脂肪可令導致稱為「瘦素」嘅內分泌失衡，嚴重可令睾丸素下降，而令乳房腫脹。

2. 年齡與生活習慣

隨著男性身紀增加，睾丸素會下降。而缺乏運動，生活欠缺規律，亦令呢個階段提早來臨。

3. 濫用藥物、酒精

吸毒、濫藥、飲酒過度，都會影響身體內分泌。

點樣解決「肥仔波」?

1. 改善飲食

最標準答案: 多吃菜，少吃肉，更加要禁絕含糖飲料、甜食、加工食物，每日飲至少兩公升水。只要肯堅持健康飲食，體型未必會大變，但一定會健康啲。

C朗禁絕加工食物

2. 重量訓練

藉力量訓練增強肌肉，而肌肉發達有助燃燒脂肪，從而達致瘦身減肥嘅效果。要鍛練胸部肌肉，踢走「肥仔波」，呢個幾健身動作絕對有功效:

Push up 俯臥撑

Inverted Row 仰臥懸垂臂屈伸

Goblet Squat 高腳杯式深蹲

3. 帶氧運動

帶氧訓練包括跑步、游水、單車等，不過要增加肌肉量，就唔好以帶氧訓練為主力。建議於重訓後做帶氧運動30分鐘，咁就有助更快燃燒脂肪。

其實無論係咪想解決肥仔波，健康飲食、多做運動，始終都會有益身心。

資料: NHS、Men’s Health