世界盃主場館路薩爾地標體育場
卡塔爾世界盃決賽周開幕在即，32強各有捧場客，中國國足雖然無晉身決賽周，不過大陸民眾仍然關注世界盃消息。無咗國足嘅世界盃，大陸媒體又有咩可以報道? 換個角度講，中國始終係勝利一方。
大陸媒體喺世界盃開幕前席，以中國人角度作現場報道，內容有卡塔爾嘅中國餐館，點樣解向當地人民推介中國菜，卡塔爾人民又點樣食到唔停得口；移居當地嘅中國人，又點樣不忘中國魂等等。而中央台早前製作《「中國製造」閃耀卡塔爾世界杯》節目，介紹世界盃決賽周，隨處都可以見到「中國製造」嘅產品及建築。
路薩爾地標體育場
主體育場館「路薩爾地標體育場」(Lusail Iconic Stadium，大陸譯做「盧賽爾體育場」)，由中國鐵建國際集團建造，場館可容納8萬人，為卡塔爾最大運動場。節目話，場館打破了歐美國家在行業內的壟斷地位，不過留意佢係由英國公司 Foster + Partners, and Populous 設計。
----- 廣告 Ad -----
球場具有唔少建築上嘅創新，例如係「世界上最大跨度雙層索網屋面單體建築」、「全球首個在全生命週期深入應用建築信息模型 (BIM) 技術的世界杯主場館項目」……總之勁到連卡塔爾嘅世界盃紀念紙幣亦印上呢座建築啦。
球場大屏幕
盧賽爾體育場裏面嘅70幾平方米LED顯示屏，係深圳「中國智造」生產。
世界盃服務用車
中國宇通為世界盃提供1500輛旅遊巴，在世界盃期間運送球員、工作人員及球迷之用。呢千幾部車好高科技，其中888部係充電車，可以「針對卡塔爾溫度高、風沙大的環境特點」。
執法球證
決賽周有3名中國籍球證，馬寧、曹奕、施翔組成了中國裁判團隊。
熊貓娛賓
兩隻中國大熊貓「四海」同「京京」送抵多哈，並於新建熊貓館展出。為世界盃遊客提供好去處。
世界盃商品
報道話，「各國球衣、帽子、背包等約60%的商品是由中國生產的，因質量好而深受顧客喜愛。」
中國贊助商
世界盃中國贊助商嘅數量係史上最多，共有7個品牌。
----- 廣告 Ad -----
不過有網民就話，佢哋最想係見到中國球喺球場踢波，而唔只係見到中國製嘅巴士喺球場外載客。
