我精心做咗個遊戲，等大家知道應唔應該帶行山杖，大家依照指示做就得。
以下10點，如果你認同嘅話，就請你mark低，最後計下自己有幾多條答咗「係」：
1. 你行山嘅行李係由自己孭
2. 你行山嘅行李多於5公斤
3. 你行山嘅路程多於15公里
4. 你行山一啲都唔講求速度，見到大直路都唔會跑
5. 你覺得你個背囊仲有位放一對行山杖
6. 你覺得帶支杖先叫做行山
7. 你行山嘅路線會有好多癲狗、野獸
8. 你行山嘅路線會有碎石、軟泥嘅大斜路
9. 你覺得自己有大把體力完成路程
10. 你要孭至少20公斤嘅行李
結論：
0至3條：千祈唔好帶，你會覺得好討厭
4至6條：帶唔帶真係隨便你，你自己都覺得可有可無
7至10條：依情況你其實要行山杖，不過你唔識得用都係唔好帶
----- 廣告 Ad -----
(注意：第10條答「係」，你真係諗辦法班支杖返嚟，仲要學下點用。你無咗支杖隨時碌落山呀！)
喺香港斷估都唔使用支行杖嚟過河啩。
嗱，呢個遊戲完全唔科學，我只係根據我嘅經驗去判斷用唔用行山杖。帶唔帶行山杖，好睇下面嘅情況：
1. 路程：長距離先考慮帶唔帶行山杖。因為短距離你對腳都未攰，大把喺手，孭少樣嘢啦。
2. 負重：當背囊好重，你要彎低腰孭嘢嘅時候，行山杖就真係有佢不可取代嘅功能。當然，所謂「好重」，一般人指20公斤以上，去露營或國外登山嘅情況啦。
3. 路況：根據台灣消防署嘅網頁，話：「當下坡的時候，膝蓋部分的受力在沒有使用登山杖的時候比使用登山杖的情形多出22％，大腿肌肉消耗的能量也多出21％。」即係話有大斜路，行山杖先有用武之地。香港山路樓梯多，學好上落樓梯姿勢，我覺得仲有用。
下次再講講，點揀行山杖，同點用行山杖啦。
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。