我愛上了跑女 她愛上了麥理浩 (番外篇)

圖片與內文無關

踏入九月，唔少今年玩毅行嘅朋友開始積極搵人做 support。受到佢哋啟發，講下我當年幫我老婆做 support 嘅故事。

• 日期: 毅行者活動第二日 (星期六)
• 時間: 凌晨兩三點
• 位置: 城門水塘燒烤場公廁對出

城門水塘呢個位，係100公里毅行者裏面，唯一一處無交通管制，又可以揸車入到去嘅地方。支援隊可以放心將一大批物資車到入去，然後喺燒烤場建立支援點。

不過你識咁諗，人人都識得咁諗。所以，喺最多人嘅時間，要揸車入到水塘一啲都唔容易，入到搵個位泊車更加難。到搵到停車位，然後霸個有利位置 set up 支援點，又係另一場戰役!

圖片與內文無關   (Fitz圖片)

我收到消息，我要支援嘅隊伍，已經過咗金山道，大概一粒鐘內嚟到城門。我塞車加泊車，前前後後搞咗我成兩個鐘，卒之可以著手 set up 支援點。

我：「請問你哋隊 team 幾時到? 呢個燒烤爐可唔可畀我哋用住先?」

「不成，他們現在到了!」他以普通話回應。

我：「那我可不可以『將就將就』借一點位置給我哋吧。」我唯有講我啲特區口音嘅普通話。

我拎住一大堆物資，真係行多幾步都唔想。

「走! 我們有很多人! 地方不夠!」

唔記得講，佢哋喺空地放咗個外國地震用嚟振災嘅帳幕、五張沙灘椅，另外有幾個人分別霸咗三個燒烤爐。但係，一個毅行者都未見到。

小弟電腦繪圖只有小學程度，希望唔好介意。

到兩個鐘頭後，我完成支援工作揸車走人。佢哋生霸死霸嘅地方，仲係人影唔多個!

沉默，不說話

講返嗰日喺城門通宵搞咗我成晚，諗住去支援老婆。結果係點? 佢一個箭步喺金山衝落嚟，放低背囊，衝入廁所。五分鐘後孭返背囊，拎咗盒飯，走咗。整個過程，佢一句說話都無同我講過……

(待續……)

致讀者: 承蒙讀者厚愛，我嘅文章竟然有人睇，深感榮幸。但是小弟不才，識字唔多，要寫篇文字通順，有情有理嘅文章，其實一啲都唔容易。《我愛上了跑女 她愛上了麥理浩》下集完結篇，一定會盡快寫好。

Fitz連結: https://fitz.hk/?p=102752