終於來到比賽中最艱難嘅一部份,呢一日係 long day,共要完成 82公里。

早幾日都唔敢跑得太多,目的都係要避免生水泡及留力應付這一天。無奈的是,long day 之前嘅兩晚,因為訓響自己側旁嘅內地選手較晚完成賽事弄至很夜才入睡,結果自己受到影響,兩晚合共都只係訓左七個小時;實在不得不擔心,酷熱下還欠缺足夠睡眠,會否影響到這日嘅狀態與發揮。

[撒哈拉超馬] 第四日- 82公里長征_01
每日起步前大會都會有 briefing ,參賽者都要早 30 分鐘到起步點聽大會講解

每一日賽前起步約 30分鐘都要到起點聽briefing,大會會宣佈領先選手名字及排位,繼而宣告有多少人已退出比賽,之後就會簡單講解當日賽道嘅情況。每次到呢一刻,其實我都有點「沾沾自喜」仍然可以企響拱門前聽大會嘅講解,因為這證明我是一個有能力嘅跑手,仍然有資格去繼續進行比賽。

出發前繼續有睇過 road book,今日無因為係 long day 而減少難度,反而還要行過一個又一個嘅 stone hills,好不嚇人。除左起步頭 5km 我稍為 jog 了一會外,往後嘅路段我都決定以急步行代替。Cp 1 後,終於要上一個,「12 average slope until summitwith 30% over the last 500m」嘅山;上山嘅路有八成係幼沙以及碎石,真真正正行一步卻倒滑兩步; 呢個時候行山杖就發揮了佢最大嘅作用,多左兩個支點令我多一份支撐,企得較穩外發力亦較為容易 ; 上山頭段盡是幼沙,中段開始斜度加深之餘更是滿佈碎山,上山嘅路越嚟越窄,結果弄至大塞車。慶幸當時有點涼風,感覺不像早兩日前上另一座山那般悶焗。唔少選手(包括我自己在內)因為不想浪費時間,冒險想響碎石路側旁嘅沙路跨過塞車人龍,,但因為真係太斜,,我地都要用手抓住側旁嘅大石先能夠企穩提腿。大會見狀都不停呼喚選手行返碎山路以免意外出現,最後我一仆一碌,終於上到了頂。因為上山用左唔少時間,落山亦係自己較為擅長,於是我加快左一點腳步,左穿右插跑過人龍,直奔到底,感覺相當暢快。

[撒哈拉超馬] 第四日- 82公里長征_02
「12% average slope until summit, with 30% over the last 500m」,真得舉步為艱

接近 CP 水站,工作人員總是笑容滿面地等待你。佢地都會向參賽者問好及打氣,令人總是有份窩心繼續有心機向前邁進。每次到水站,大會會因應之前走左多少路、之後下一個 CP 相隔多遠及難度有多少而決定提供多少支水 (每支1.5 公升); 只是有多少支水也好,我通常會先即時補水喝個飽,然後再倒滿兩個 750ml 嘅水壺,餘下嘅水就用來淋面淋身;如果再有剩餘的喝多兩口就會放回回收水樽位置附近。這樣做主要係避免帶太多水上路以盡量減少路途上要所承受嘅負重。 然而呢個過程都要小心評估自己一向嘅耗水量,下一個 CP 嘅距離以及當時氣溫有多熱。不少嘅外國選手還是會手捧住餘下嘅水繼續行程,雖然重量多了但亦減少中暑嘅機會。事實上參加一些難度高嘅比賽前,真的要盡量認識多一點自己身體機能及在唔同環境下嘅生理反應,那麼臨場評估及判斷會更為準確,發生意外或問題就相對會較少。

[撒哈拉超馬] 第四日- 82公里長征_03
如果無行山杖,真的不知何時才可以上到山頂
[撒哈拉超馬] 第四日- 82公里長征_04
每次到水站都會見倒工作人員掛住笑容

Long day 最難倒自己嘅事情,就是應該為呢日預備多少食糧. 以往自己參加過嘅比賽,一向都係響 CP 有食物補及,餓就食多一點,不餓就再等下一個 CP 食也不遲,所以從來都無為意或計算自己響比賽過程中需要 consume 幾多食物。 所以 LONG DAY 前真是費煞思量,一方不想太重而不想拿太多,另一方面又擔心如果真的不夠又求助無門。最後我根據大會每日要求要有 2000 卡路里嘅指標,並估計自己 24 小時內應該會完成嘅情況下,預備左約 3800 卡路里嘅乾糧在路途上食。只是CP 2 後開始烈日當空,加上之後嘅路段一點都不易,上完一個又一個 stone hills,體力消耗比想像中多,乾糧似乎唔足夠下自己一直都不敢進食太多,結果能源不夠體力越來越差,手腳越見無力,背囊更是越來越重,好像有點「爆爆地」。我心中大叫不妙,再度減慢速度一步一步踱到 CP3. 以往到 CP 我迅速補過水後就立即出發以節省時間,今次我知道不行,要讓自己有個喘息,所以連背囊也除下來讓自己好好地作息了十五分鐘。 跟著到 CP 4 8 KM,仍然全身乏力,開始西斜嘅陽光更是令人感到暈眩;好不容易終於「捱」到已達半程嘅CP4,我決定除下背囊再讓自己休息十五分鐘,並且食左半個響 CP 3已沖定嘅脫水飯;我知道必然要好好補充能源,然後才有力氣繼續行餘下嘅路。

[撒哈拉超馬] 第四日- 82公里長征_05
整個賽事主要係食脫水飯補充能源,一般係在完賽後晚上煲水後沖食;long day 當日因為擔心乾糧不足,自己都預備左一包響有需要時用凍水沖食,結果真的響半程用得著
[撒哈拉超馬] 第四日- 82公里長征_06
沙漠西斜嘅陽光,其實也相當要命
更多:
Fitz.hk Facebook專頁
[撒哈拉超馬] 第三日: 無盡的沙漠
[撒哈拉超馬] 第二日: 沉重的背囊
[撒哈拉超馬] 第一日: 34公里的挑戰
張思縈@Fitz.hk
Fitz Hiking 行山

分享
張思縈
任職社工,從事戒毒服務已有十八年, 也是一名運動愛好者、旅者以及攝影人; 喜歡嘗試新事物,並相信透過參與、實踐更能體驗人生。於 2015 年遠赴北極參加馬拉松,希望以克服極地環境之挑戰,宣揚「走出局限,奔向夢想」之康復訊息,鼓勵康復群體抱緊信念,努力跨越康復道路上所經歷之障礙,堅守康復方向,繼續追求人生所訂立之目標。