作者潘潘 (前排左)

點解會去韓國行毅行者?

樂施會毅行者活動係一項長途山賽活動由香港出發傳承至世界各地,用體力加毅力完成指定路程既山路;今年年頭收到消息韓國將會於5月20至21日首辦毅行者活動,傾傾下我地呢班愛山之人就組左「有一班行山友叫獅子山」飛左轉韓國去感受一下韓國既山勢美景。韓國毅行者賽事限時設定為38小時,再查看大會的路線爬升幅度圖,應該最難都是一開始要爬升近1500公尺的老姑壇(智異山國立公園的三大主峰之一)。經過幾番思考,一方面我認為自己應該可以應付到這座山,另一方面又好想體驗下韓國的山和風景,於是就決定參賽!

賽後反思

1. 同處海角天邊,拋棄區分齊共勉。
到國外行毅行者,最大挑戰係你唔知條路係點樣?會有幾難?韓毅條路有好幾段都是山林小路並唔是一般健行郊遊徑,我哋都是靠搵大會掛的指示條/牌來搵路行。當你突然眼殘睇唔到指示牌行錯路時,後面既韓國人會大嗌。當你行到垂頭喪氣步伐忽快忽慢時,韓國大媽響後面突然好有力咁急步衝上來過你頭,同時叫你「俾啲力,加油!」。另外,海外隊伍中香港隊佔九成人,途中遇到香港人又會互相鼓勵支持下,你哋影我哋我哋又影你哋,你哋撐我哋我哋又撐你哋,響呢段咁具挑戰性既山路中,每個勉勵與支持都值千金。多謝Team 36!

2. 同舟人,攜手踏平崎嶇
去到CP4已經入黑,埋位同站牌自拍時,helper喔巴主動幫我哋揸機另加幾位可愛既阿則斯幫手打燈,好搞笑。響check-in之際又再遇到之前碰過幾次面,由英國來韓國教英文既外國靚女,佢哋另外2位隊友quit左,咁我哋就一齊同行一段路,而第4段路真是相當崎嶇上山幅度大落山幅度一樣大,急上急落,行左三分一左右佢哋都因為腳痛放棄左。同行仲有2隊韓國人,我地停佢哋又停(讓左路),大家又願意等埋一齊,變左一隊十人行,好有趣。大家都係行同一條路又唔係好熟悉,一齊行無咁驚又有種驅動力要追尾燈。同舟人,好重要。

3. 那日那夜,心有不甘;唯願日後,力所能及。
我們隊最後於CP5剪帶,跟大會資料就53K止步,而根據多款智能運動手錶既統計應該最少行多左10K左右,即是話全程應該是多過100K。當時我地落左座1500米既山再加一大段平路原來都只係得大會所計10K;另加CP4去CP5果段不斷上山落山起碼十次,想像下當你以為自己落緊山去CP5 點知行到尾叫你再上返山(重覆約5次),再想像下當你行緊車路以為一直隡落去就會係CP時突然叫你轉個靚灣入樹林繼續上山落山(重覆約3次),10K路程用左近4小時,又當你見到個staff可以問下仲有幾耐到點知話你知仲有3K,要多起碼1小時而最後係用左近2小時,真是極度消磨意志,而經過咁多次既上山落山,我哋都灰左。商量過後,以整隊既狀態預料我哋有機會只能僅僅夠時間去到剩餘既CP,而CP臨收都係一個近乎無水無糧既狀態,無support team 加大會無糧提供,而CP 6同8都係一個小大佬又是非常的斜,捱係有可能捱到,同時都有可能有危險,始終段路有難度而又未行過,止步或許是一個較安全既做法。

老實說,剪帶後那晚,心確有不甘和婉惜,消化過後,毅行路上每位參賽者既終點都不一樣,去到邊個位不是最重要,重要既係沿途既風景人情,隊友間既不離不棄,互相扶持,或許這才是獅子山精神。

如能堅持到最後當然最好,但能力未及搏盡或許傷害更大,安全為上,過程既點點滴滴,才值得記一世。

今次韓國之旅,眼睛紀錄了好多靚山景,腦袋裝滿了與你們同行相遇的記憶,好開心好滿足。

後話

聽聞頭十名當中,有八隊都是香港隊,CP5會說普通話既韓國阿豬媽話:「你們香港人都是超人喔…好厲害der~」

順帶一提,樂施會香港毅行者將於 2017年11月17日(星期五)至19日(星期日)舉行,報名開始左亦都結束左(馬騮掩嘴),如果有人邀你做隊友,不妨同佢練下麥徑,或許你好行得。上年呢個時候我剛開始行山,對毅行者要行100k,心諗:『100k喎,點可能做到!』經過數個月既練山,愈行愈愛,最後,以慢腳成績41小時完成100k。



有一班行山友叫「獅子山」Facebook 專頁

Law少 許耀斌 Facebook專頁

更多:
Fitz Facebook專頁
[有一班行山友叫獅子山] 學做隊長,先要學放棄 (韓國毅行者2017)
[有一班行山友叫獅子山] 史上最攞命的毅行者 (韓國毅行者2017)
[有一班行山友叫獅子山] 寫在韓國毅行六個鐘前…
[有一班行山友叫獅子山] 韓國毅行第一戰「敢死隊」
[出戰韓國毅行] 有一班行山友叫「獅子山」
[韓國首屆樂施毅行者] 踏上全羅南道 進入仙境 文化遺產之旅


文章為作者意見,不代表Fitz立場。

歡迎投稿: http://fitz.hk/contribute/

潘潘
鍾情於天空的美和大自然的能量,愛上行山用眼睛紀錄這美好的一切。憧憬自己能到世界各地繼續用盡歌聲,詞語讚美那創天造地的智慧。