[毅行備戰2016] 人哋嘅失敗係最好嘅教訓(下)

續上回，繼續講講毅行失敗教訓：

1. 前單車王子（而家已係渣馬Sub 3嘅跑手了）洪松蔭，連同電台主持周鵬等，喺2009年出戰毅行。起步時，氣溫大概23、24度。當時我山雞有幸遇到佢哋，睇住佢哋熱身後，將長衫長褲交晒畀支援隊，諗住一跑到尾。最後，毅行者遇到歷年最冷嘅天氣，大帽山山頂錄得攝氏零度。洪松蔭一隊，雖然中途有支援隊朋友拎咗件風褸畀佢哋，但結果就要喺鉛礦坳剪帶。

教訓：留意天氣，做足準備。不過，好似09年咁極端咁又真係唔多見，阿松佢哋都算死得唔抵呀。

2. 2010年，天文台預測間中有雨。家聯夜晚七點幾上到牛耳石山，突然狂風大雨。一行四人竟然連便利雨衣都無一件。全身濕晒之餘，佢仲係要著對跑鞋落碎石路。結果又係剪帶收場。

教訓：同上。補充一下，裝備固然會增加負重，但負重係咪真係對表現有咁大影響呢？好多時候，我都唔覺增加些少重量，會影響得好大。反而，缺少某些裝備，就真係完完全全搞到要退出，咁就一啲都唔值得囉。

3. 有人為咗參加毅行，就要問公司攞大假。而起步前一晚，為咗要放假就要做到朝早六點，然後匆匆入北潭涌起步。到當晚深夜，行到第四段已開始嗌眼瞓，去到茅坪直頭話要瞌5分鐘、10分鐘。到CP4基維爾，見到尼龍床一句唔該就衝埋去瞓足大半粒鐘，要其餘三個隊友又鬧又推，佢先可以慢慢繼續行。去到城門，其餘三名隊友計過條數，發現唔衝就唔可以48小時內完成。於是就要求呢位隊友剪帶，其餘三位衝向終點。最後，啱啱47個鐘完成活動。

教訓：毅行者要求參加者48小時完成活動，咁唔該預自己有48小時體力啦。上面呢個CASE，因為自己嘅問題而搞到其餘三名隊友受苦，真係丫……唔怪得有人話，參加毅行，一係就多咗啲朋友，一係就多咗啲敵人。

4. 有四個人之前素未謀面，基於某些原因在九月左右組成一隊，練過兩三課左右。到正式毅行，其餘三位隊員覺得隊員一號行得太慢，言語單打之餘，仲唔會等埋佢。最後，呢位隊員一號，抵受唔到呢個壓力，喺CP3退出。而其他嗰三位懶係勁嘅隊員，雖然叫做完成活動，但係咪又係拎唔到Full Cert。

教訓：樂施會講扶助弱勢，所以毅行者其中一個重要嘅精神，就係要關顧隊友。而每次過檢查站，都一定要等埋所有未剪帶嘅隊員。上面呢幾位懶係勁嘅隊員固然要譴責，不過亦要提醒大家，錯點鴛鴦呢家嘢喺毅行者間中有出現（情況大多係有人中籤，但搵唔夠隊員，於是就搵到啲唔知點嚟嘅隊員嘞。），就算大家都係行山老手，都唔該要一齊練多幾課。唔一定係鍛練咩技術，反而係要互相了解，增進感情。

不過，我山雞就覺得，如果畀個三唔識七嘅人做我隊友，我情願唔行咯。

更多：
Fitz.hk Facebook 專頁
[毅行備戰] 人哋嘅失敗係最好嘅教訓(上)
[毅行備戰] 系列
山雞其他文章
Fitz Hiking 行山