Fitz > 運動 Sports > 行山 Hiking > [獅子山精神隊] 毅行者後感: 舊事已過,一切都變成新的了

編按:作者兼「獅子山精神隊」隊長Law少許耀斌,為商業電台前DJ,因患有思覺失調的哥哥跳樓自殺,毅然辭職。酷愛體育運動,多次參加馬拉松及毅行者,曾為自己和哥哥寫下回憶並出版《原來在沒有盼望的地方才需要盼望》,藉着分享,將故事獻給精神病患者及所有人。

毅行後感,今篇先寫寫自己。

有一班行山友叫「獅子山」,忘記幾時想成立,到做了,去韓毅,失敗而回,再組獅子山精神隊,原來幾個月間嘅事,每次坐公司穿梭巴士,喺對面海望住獅子山,嚟到九龍再望獅子山……

山,本身就係神在地上最美好的建築,摩西領十戒要登山,耶穌講道、祈禱、變像要登山,詩篇寫以色列人往聖城耶路撒冷,亦要登山,才有上行之詩《向山舉目》

2017 係我嘅學習年,不論個人工作、想起 TEAM,要出書,再受頸痛手痹纏繞,好多憂慮,停唔到落嚟,抖唔到氣,用一年時間過兩年嘅生活,焦頭爛額,十個馬桶九個蓋,大泥都提過我,要「留d俾自己」(呢樣嘢喺山上我想搵人幫但無出聲嘅時候感覺最深,正式參加但係用完全support嘅心態去行,好經典,我無俾任何人按過我,唯一俾可誼打咗我頭一下,我係好記仇)

但始終不改我個人作風,要衝到尾再回頭睇。

攝影:威濂臣

勇敢去冒險啦,只有咁樣嘅人生先會有驚喜,我曾經講過,要活得雙倍精彩 (五年喇,有時都忘記咗自己咁樣講)。能夠雙倍精彩嘅唯一方法,係令其他人都精彩,而毅行係一個好方法。

走到呢刻,真正感受到奇妙,不作他人選的隊友,成就了一件別具意義的事,神真的有保祐。

做人有幾時能夠為其他人揹背囊? 機會不多。又有幾時能夠與人同行一段艱難的路? 亦不多。能夠的時候就盡力,讓其他人登上斜坡,一口氣到頂。

當身邊無 support team,自己同 Raymond 手拖手扶過級嘅時候,突然覺得自己可以為認識咗幾個月嘅年輕人咁樣付出,而且係輕省地付出,心情非常遺憾。

能夠做嘅,以前無做到,宜家點做都返唔到去以前,喺新書裡面我為舊我寫咗一句作為警惕:

「成長就係了解到自己曾經有幾自私。」

就好似越識得多嘢就知道自己無知,越去學習同實踐無私,就知道自己有幾自私,面對自己,有時默然亦無語。

喺城門見 T-shirt 紅海,再高唱《我要向高山舉目》,再祈禱,係非常感動,將四個人嘅事,變成很多很多人的事,希望大家都感受到精彩。

對我嚟講,2017毅行轉捩點就係喺完全放低自己只求三位隊友完成的一刻,我由第四段完擔心 RAYMOND 能否繼續,心情之差,到一轉念後越行越有,我感覺得自己力量比以前更大,一直無乜用杖,到行七十幾公里後,仲可以以歷史性高速加上能見度兩米嘅視野 (只足夠唔跌落山) 由四方亭直爆上頂,逢人過人,再好似細個去歡樂天地玩賽車淨得條白線喺度轉咁,狗衝落山,原來大帽山係可以得兩米圓周,伴隨著殺人風勢同雨粉,鬼哭神號,有種被大自然攪拌嘅感覺。

其實,我一生都在經歷「大龍鳳」,心裡面微小的聲音就教我平安。

舊事已過,一切都變成新的了,感恩能夠清楚自己自私嘅一面,亦同時感恩。

山上的人教人謙卑。

有很多人都做了非凡的事,而我想像自己做唔出:

  1. 潘潘隊可以送隊友去睇急症 (真心有人陪,我未必會陪GRACE落山),做得好,然後再上第四段完成餘下挑戰 (阿wind話以為有人QUIT就完,聽到再上山嚇親)
  2. 夏威 BONNIE 玩完23個幾鐘可以嚟大帽山 support 我地,真係好爆驚喜
  3. 可誼同 Gas 行咗30幾個鐘捱凍捱眼瞓仲等埋其他人 (我真係好想喺度爆大鑊,激死我)
  4. Fitz 統籌嘅 Support 係可以即call即有,同打仗無分別
  5. 好多 Support team 第一次見就通宵陪行,好離譜
  6. 頭尾我見到一隊視障人士隊,究竟可以點行得到?

我相信呢啲作為,係真正體現獅子山精神,用行動去回應呢個時代嘅香港同香港人,一切都可以變成新的。

忍住呢一刻嘅埋怨,愚蠢地熱血地讓其他人活得精彩吧!

左起 Law少, Willy 黃宗顯醫生, Jacky, Raymond
設計鳴謝: 築字室主理人Vicky IG: 築字室

Fitz 樂施毅行者

每年樂毅施行者,Fitz 都會組織一支隊伍,目的不是要挑戰時間,而是希望承傳毅行精神。今年我們以 Law少 許耀斌 帶領一支由精神康復者及精神科醫生組成的隊伍,期望可令市民對精神病有更正確的認識。

鳴謝行山鞋贊助:Merrell Hong Kong

樂施毅行者網站
樂施毅行者 Facebook 專頁


更多:
Fitz Facebook專頁
一次毅行一份情
毅行者的魔力
[樂施毅行者] Support Team 支援點攻略
[樂施毅行者] 毅行隊伍的「第5人」
Fitz 行山 Hiking


文章為作者意見,不代表Fitz立場。