今年獅子山一班人，一齊入紙抽全軍覆沒，唯獨一隊一支獨秀，四個成員都抽到，天意安排之下個個都成為隊長 (今年隊號1017)。 佢地本身嘅朋友又自然成為毅行初哥，而今年繼續有核心隊拿住「獅子山精神隊」個嘜頭喺麥徑上「呃吓飯食」，攞吓支持，嗌吓救命同想死。
四位成員
隊長潘潘，獅子山核心成員，由2016年香港毅行30個鐘行1-6段，10個鐘行埋7-10嘅人都癲之旅，到2017首屆韓國毅行經歷過臨出發前一晚親戚探望嘅「感人肺腑」，開始變得無堅不摧，一路完成2017香港毅行同逆走，過百公里都係食自助餐咁食，借用聖經中雅歌一句：「我雖然黑，但很秀美」，反映出佢越運動越美麗。
一年前，隔離隊潘潘就係喺jacky仔終點前行到懵咗嘅情況下出現，同佢講咗聲加油，jacky就醒一醒，用埋最後後備電捱到終點先暈低。（唔關潘潘事）
2017年同一日
Betty (醫科生）、Flori （醫護人員）就係support 獅子山精神隊，喺我地龜速前進嘅情況之下增進不少友誼，應該因爲太得閒，同埋有十個護法喺Raymond附近，佢地絕對要自己搞掂自己，同埋一邊睇一邊胡思亂想。
做人就係一時諗唔開，就會俾人呃咗去參加毅行，歷世歷代歷史循環。好在flori 成熟的嚟唔穩重，永遠周圍飛無時停，今年註定留底好多腳毛，唔使激光。
Betty 就更加神奇，人地一試就知龍與鳳，佢就一買就知，知佢骨格精奇但唔知佢喺山系鋪頭都係VIP，重要係終身制，廿歲人究竟要買幾多錢幾多次先可以有終身榮譽VIP，最多咪3歲開始，巴閉。
加埋上述兩位都玩開龍舟，實在唔怕攰到蛇都死。
好啦，個個女士大有來頭就梗係要嚟個反高潮啦，嚟個最少運動青靚白淨又有音樂才華嘅文青KA MING。或者佢會攞埋結他上山助興，如果仲有氣係會唱埋歌。
四個人佢就最患得患失，一度覺得自己完成唔到，形成一個完美三娘教子之局，期望佢毅行前後可以一曲訴心聲。
介紹咗咁耐，最重要都係講返獅子山精神隊嘅一個非常重要嘅宗旨就係：
「新嚟小鮮肉」，未玩過一定優先，大家無經驗，有熱血，只要唔斷腳都會返到嚟。
我就負責陪行同謹守山中騙子的崗位，昆你上山直落去尾，祝福大家行一次、記一世。
太多運動衫可以直接支持：1017 ，有興趣就睇下面
『築字室』設計師方立一為獅子山精神隊設計一款兩色的隊衣，除了經典『獅子山』及『向高山舉目』墨寶，配合毅行路線圖，加上男女裝前後皆可拼成整條路線，扣除成本後會將捐款全數捐給樂施會，希望打爆籌款數字，首批隊衣預期在毅行比賽前送上。
如果你都想繼續支持我地，等大自然親手悉心改變更多人，請你捐款或買隊衣支持我地。
以下係訂購表格，詳細可以了解吓，唔明可以搵 Law少。
>
>> 更多獅子山精神隊的故事，見《[獅子山精神隊] 一件tee 一個故事》
Fitz連結: https://fitz.hk/?p=105698
更多:
Fitz Facebook專頁
[獅子山精神隊] 友情分水嶺 2017年隊友 Raymond (毅行倒數28日)
[獅子山精神隊] 友情分水嶺 (毅行倒數29日)
[獅子山精神隊] 一件tee 一個故事
Fitz Hiking 行山
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
