[美國PCT] 4300公里的狂野行

「重行人生」阿寶，5月開始踏上半年嘅征戰之路，挑戰PCT 4300公里為截肢者籌款。其中一個最基本嘅問題，究竟PCT係一條咩嘅路呢？

PCT全名叫Pacific Crest Trail，中文叫太平洋屋脊步道，位於美國西部，路徑穿越內華達山脈以及喀持山脈。起點由加洲接壤墨西哥嘅邊界開始，經俄勒岡州，最後到達北面華盛頓州嘅加拿大邊境。全長4286公里，平均完成時間係150日，即係成五個月，呢個時間係平均每日要行30公里，每日行10小時。

PCT橫跨三州，途經25個國家森林、7個國家公園以及43個國家生態保護區。其中最大挑戰，係在途中會經過美國本土最高峰，海拔4,418公尺嘅惠特尼峰（Mount Whitney）。山中終年積雪，阿寶亦因為咁，而必需準備爬雪山嘅裝備！

因為整段路要大概半年時間完成，為咗避開北方嘅嚴冬，參與者通常都係春天起行，以免在冬天露宿山野。而亦因為咁，每年有心挑戰PCT嘅朋友，都會相約一天，齊齊起步。而阿寶佢哋今年就定係5月1日喺墨西哥邊境起步嘞。

PCT雖然1993年先正式完成路徑建設，但其實有超過90年歷史。而近年因為挑戰者眾，亦衍生出好多好有特色嘅文化：

1. 沿路有Trail Angel (步道天使) 義務 (或接受捐助) 為陌生嘅挑戰者提供食物、食水、順風車，甚至住宿。而途沿會經常看到Trail Magic補給箱，放有上述物資。
2. PCT挑戰者會於沿途攔截順風車，以到沿途小鎮補給購物，或到郵局領取物資。
3. 參與者若中途不支，或遇到惡劣天氣。可選擇中途離開，情況許可下再返回退出點，繼續路程。
4. 除咗阿寶之前講過嘅非正式起步禮外，PCT成員都發展咗唔同嘅節目。例如每一年6月21日係Hike-Naked Day，參加者會影裸照慶祝！

PCT為美國健行三冠王（The Triple Crown of Hiking）其中一冠。其他仲有AT及CDT：

• PCT：Pacific Crest Trail – 2,654 miles (4,286 km)
• AT：Appalachian Trail – 2,184 miles (3,515 km)
• CDT：Continental Divide Trail – 3,100 miles (5,000 km)

2014年，電影《Wild》(港譯《狂野行》)以PCT為背景，講述一位對山野一無所知嘅中女，單獨踏上呢條步道。藉荒野上挑戰，以求治療自己。女主角Reese Witherspoon仲得到奧斯卡女主角提名。

了解完呢條路線後，相信大家更會盡力支持阿寶嘅「重行人生」大挑戰！

資料來源：pcta.org、維基百科、獨立媒體

更多：
Fitz.hk Facebook專頁
[重行人生] 100英里達成
[重行人生] 一個非式的開幕禮
[重行人生] 跨越美國之旅的前言