控煙政策公眾諮詢 | 郊野公園應列禁煙區?

前環境局局長黃錦星，早前話佢去釣魚翁行山，大讚釣魚翁山勢奇特，風景優美。不過，當行到山頂時，吸入嘅並唔係清新空氣，而係陣陣煙味。原來，有幾名行山客喺山頂標高柱「圍爐食煙」，黃錦星有加以勸阻，之後係點就不得而知。

郊野公園現時並無禁止吸煙規制，同市區行人路一樣，只要係露天地方就可以食煙。至於煙味係咪影響其他人，並唔係現時嘅禁煙法例所關注。

《控煙策略諮詢文件》

政府早前發表《控煙策略諮詢文件》，就控煙政策作公眾諮詢，諮詢期至9月30日。不少關注環境嘅團體，呼籲大眾積極提出意見，例如建議將郊野公園列為禁煙區。

去郊野公園都係為咗接觸大自然，遠離城市污染。喺郊野公園食煙除咗造成空氣污染，隨處亂丟煙頭亦會製造垃圾，甚至引發山火，所以將郊野公園列為禁煙區，實屬合情合理。