龍脊的「龍爪手」已經拆除 攝: 山友「主席」
龍脊出現「龍爪手」裝置，擾攘幾日，全世界一面倒劣評。漁護署卒之承認責任，話呢嚿嘢只係「試驗性質」，佢哋明白「因為同附近嘅自然環境唔夾，所以已經拆除，之後亦唔會喺呢度出現」，咁佢哋都算係順應民意，從善如流。
由呢隻「龍爪手」，有人諗起漁護署呢一類「除褲放屁」嘅設施其實都唔少。「龍爪手」雖然已經拆除，但郊野公園仲有唔少奇怪設施。
大浪西灣觀星台，興建目的為供遊人舒適悠閒地躺下觀星。(來源: 發展局)
「龍爪手」精神不滅
《📸郊野自拍座📱》
俗語有云，得神器得天下， selfie神器一向係KOL 嘅重要裝備。郊野公園工匠用枯木自製咗呢支自拍座，既可以放相機又可以放手機，仲幫你mark埋靚景位，令你安心擺pose。其實靚景一直係身邊，…Posted by 郊野公園教育活動計劃 Country Parks Education Programmes on Wednesday, December 16, 2020
幾個月前，幾個郊野公園設置咗木制嘅「自拍神器」，漁護署似乎好重視市民嘅「打卡」權利。同一想法，拆走咗嘅龍脊「龍爪手」，興建目的又係咪畀市民打卡之用?
前港督麥理浩爵士，最初成立郊野公園嘅目的，係為咗保育郊野環境之餘，亦希望市民能到郊野舒展身心。到如今，政府眼中嘅郊野景觀，已經成為「本地旅遊項目」。
----- 廣告 Ad -----
最明顯嘅例子，就係啱啱公佈嘅財政預算案，政府計劃撥款9.34億重振旅遊業，本地「綠色旅遊」更為重點項目，當中1.69億元會用作繼續開展本地文化、古蹟和創意旅遊項目，例如「鹽田梓藝術節」及「城市景昔」等。另外，預算案同時亦有撥款改善郊野公園設施，改善行山徑等，所以大家可以想像到，未來香港郊野或會如各區騎呢地標一樣，會有更多「龍爪手」出現。
深井燒鵝像為地區騎呢地標經典之作
今次漁護署可順應民意，難保未來會因各種原因企硬。
