毅行者呢個活動，其中一項最令人稱頌之處，就係好強調團隊精神。佢哋嘅團隊精神，除咗講求「四人八腿一條心」之外，仲好鼓勵各支隊伍要籌組支援隊。不過，毅行朋友去到支援點，就要好好安排必需要做嘅嘢：
- 休息，休息，休息
可以係企，可以係坐，可以係瞓低，但千祈唔好瞓著覺。幾眼瞓都好，一瞓著要撻番著副engine，一啲都容易。 - 食嘢
喺大會補給以外，食番啲啱自己口味嘅嘢。不過，萬事以快速行先。所以食物盡可能要易入口，容易食。例如，嗰個時候唔好叫朋友整碗熱粥畀你。而我個人食過最好嘅毅行補給，就係薯仔濃湯。咬都唔使咬，飲兩碗就飽。 - 補給物資
補下Gel，補下運動飲品，補下零食，補下電池，甚至換下衫換下襪。到CP8荃錦坳，更可以換埋跑鞋，呢啲真係唔靠支援隊唔得。 - 更換裝備
有咩衫褲鞋襪行行下覺得唔妥，真係要急CALL支援隊拎過套嚟。2009年冷鋒突然襲港，唔少隊伍就急CALL支援隊四出搜邏禦寒衣物。 - 個人護理
小至搵人拎牙刷（嗱，第二朝記得刷牙，真係會醒神百倍！），大至搵人按摩鬆筋（最好有個手勢好嘅朋友），都應該要喺支援站做。 - 傳遞訊息
叫支援搵定其他毅行朋友嘅最新情況，可以當趣聞聽又得，用嚟鼓勵自己又得，更可以代向家人報平安。
出色嘅支援隊，物資食物真係一應俱全。
更多資料：樂施毅行者官方網頁
----- 廣告 Ad -----
毅行．傳承
Fitz.hk為樂施毅行者2016大會媒體伙伴
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。