[獅子山精神隊] 對不起，隊友們，我要變魔鬼了

如果你每星期操一課，一兩段，你只餘十次操山機會，未計缺席遲到早退，由頭到尾行哂成段路程都好急。

八月週末極端酷熱，我個人都未試過攝氏37度行山，而且係個個星期都三十幾度，睇住三個之前幾乎零操山經驗的隊友，呢幾次練習，心入面好多掙扎，想激勵佢地突破極限，但每個人感受到極限個位唔同。

最近唔覺意又睇返 Denzel Washington 2000年嘅作品《Titans》，故事講種族歧視仍然相當嚴重的70年代美國，黑人教練取代白人教練作為黑白人合併高中的美式足球總教頭。佢一視同仁，無分種族，NO DEMOCRACY, JUST DICTATORSHIP.

有一段講個隊員要飲水，佢嘅回應係懦夫先要飲水⋯(詳細睇圖)

(我成日有提班懦夫要飲水）

點解教練只有魔鬼教練，無天使教練? 因為跟天使係練唔到嘢。黃醫生打破佢平時少運動的習慣，喺只剩三個月時間接受毅行呢個死亡挑戰，已經好唔簡單；RAYMOND 昂藏六尺，每落大樓梯都有種跳樓感覺，同埋佢以前試過行唔掂要人上山救援。唯一係有跑步習慣同身型適中嘅 Jacky 仔係唔需要人擔心。

按現時狀態，48小時內完成係絕對無問題，但我行過 47:XX，作為最後的隊伍齊人完成，係人上人嘅練習，因為抵抗睡意係苦中苦，諗起都驚：最後階段只要一靜止，個人就熄機。諗諗下同今年有d似，都係一帶三，都係對完成時間不帶期望，唯一，我地更有決心去練習。

現時練習的唯一要求，各位初哥都可以仿效，三個字，「唔准停」，全部都要一口氣但按自己的步伐直上到頂先可以休息，無論你幾慢都好。

所以成程最重覆的對白就係「唔准停」、「唔好停」、「唔好抖咁耐」、「一路行一路飲」、「一路行一路食」、「唔好停」。每個人行山都有自己嘅節奏，而每個人速度同持久力都唔同，每個人嘅極限都唔同，但我相信：

每個人遇上極限同要突破佢嘅感覺都係一樣：「好想死」

唔死過邊有得返生? 我相信所以頂尖運動員都死過無數次。所以：對唔住，各位隊友，當你覺得好辛苦嘅時候，我會再迫你上多十級八級，因為要突破，辛苦係唔夠，係要想死先得，係要好想死先可以重生。

與其他毅行隊伍一齊操練。

毅行路上因缺少齊人練習而產生不和的情況時有聽聞，主要因為大家對行山節奏同完成時間一齊有分歧，到正式毅行嘅時間就嫌對方太慢拖累，嫌對方太快拖爆偈，嫌休息太耐，嫌無時間回復體力。一嫌就無止境。

為咗避免呢重情況發生，我地要堅守我地練習嘅態度，貫徹佢，可以慢但唔可以停，行出自己嘅步伐。

搏到最盡，將每次練山都變成脫胎換骨嘅經歷。

各位初哥，加油。

如果你想支持我哋，歡迎到 獅子山精神隊籌款專頁 捐款，多多益善，少少無拘。

Fitz 樂施毅行者

每年樂毅施行者，Fitz 都會組織一支隊伍，目的不是要挑戰時間，而是希望承傳毅行精神。今年我們以 Law少 許耀斌 帶領一支由精神康復者及精神科醫生組成的隊伍，期望可令市民對精神病有更正確的認識。

有一班行山友叫「獅子山」

獅子山精神隊樂施毅行者籌款網頁

更多：
Fitz Facebook專頁
[獅子山精神隊] 37度下 新丁打大佬
[獅子山精神隊] 毅行開操 在西貢37度的一天出發之十八死士
[樂施毅行者2017] Fitz x 獅子山精神隊
Fitz Hiking 行山