迷霧行山大法

見到大霧，係人都知唔好行山。不過每逢周末，大家唔係拍拖、湊女、返外家，就係要OT見客，成班朋友，難得夾到一日咁好興緻走入山野，除非八號風球橫風橫雨，無理由咁掃興要返屋企啩。

講到呢度，如果你都係話「咁好危險啫」，對唔住，阻你咁多時間，你都係唔好睇呢篇文。又如果你自認係行山新手，連麥理浩徑衛奕信徑都分唔到，咁你自己去漁護署網頁睇咗佢哋個行山指引先。

留喺度嘅朋友，相信大家都身經百戰，少少大霧都一定難唔到你。咁我講咁多係咪多餘呢？咁又唔係既，古語有云：「老將軍都有失策時」，咪就當同大家交流下，留意返啲重點囉。

1. 唔熟唔行
大霧季節唔好揀啲未行過/唔熟路嘅路線。萬一大霧迷路，你熟路都可以知道大概方向繼續向前行，就算連方向都迷失，有時亦可從隱約之中，睇到某些認識嘅建築物、地標或地型，判斷自己嘅位置。

2. 裝備
官府就叫人帶齊電話、哨子、電筒、地圖、指南針、充足食水食物、急救藥物…… 我再提下大家：帶電話就要帶埋尿袋（現今電話咁食電），仲應該要搵密實袋袋住。講得行山有霧，濕氣整壞電話又點用？

3. 結伴
單拖行山自由自在，我都鍾意。如果天清氣爽又熟路，上山就似出旺角，一個人當然無問題。不過天氣唔好最好搵齊人上山，最少都要四人同行。四人一隊源於軍事訓練，因為若果其中一人受傷，一個要陪佢，另外兩個可以結伴搵支援。

4. 迷途
呢個問題要詳細討論。漁護署叫人迷途嘅時候，就要往高走。因為越高嘅地方，越少樹木遮蓋，就會方便救援人員及直升機搵到被救者位置。

漁護署講法有一定道理。之但係，而家講緊大霧，越高處霧越大，直升機根本無用武之地。我就會揀向低行。原因係：(1)越低地方越易有電話訊號；(2)香港低地通常係馬路或民居。不過有走入低谷要謹記以下原則：

1. 第一時間走出密林，行大路。大路指人行嘅路，唔係獸道，最好有人行過嘅痕跡（記號，垃圾，樓級等）。若有分叉路，首要原則係揀條最闊最好嘅路。千祈唔好以為自己確定方向，然後一味衝入死路。
2. 唔好憑聲音判定距離。你唔係盲俠，唔曉聽聲追蹤敵人。況且大霧中聲音分散，難以聽聲知距離。喺大帽山山頂夠可以聽到八鄉嘅車聲，咁係咪好近先？
3. 山谷多密林、風水林，如非肯定位置方向，不宜衝入林中浪費體力。
4. Bear Grylls（野外求生專家，《Man Vs Wild》主持）教人第一時間搵條河，沿河落低地（佢直頭會跳落河游水）。真係搵唔到路都可以一試，不過香港山野小溪為主，不易發現，而沿河嘅路亦唔好行（除非諗住落河），又多山澗瀑布。如非不得已，我就唔會咁行囉。

Bear Grylls最鍾意落河玩

講住咁多先，不過老套啲都要講多句，萬事小心，安全至上。