[重行人生] 徒步旅行的6個好處

1. 用最慢嘅速度遊覽
相信大家都試過，當你地由一個城市坐巴士去另一個城市時，窗外見到好靚嘅風景，但因為係車上而無得落車實地欣賞，如果徒步嘅話，你唔單只玩齊你去過嘅城市，更唔會錯過城市之間嘅所有風景，仲可以比一般人見多好多不知名嘅秘景添！

2. 邊旅行邊做運動
邊個話去旅行返黎一定會肥左幾公斤，你肯去徒步旅行，邊行邊食都唔洗怕肥，男士們仲可以鍛鍊埋大小腳瓜，消耗多啲脂肪身型更加Fit。

3. 慳交通費真正窮遊
去旅行嘅洗費不外乎「衣食住行」，如果你堅持只係行路的話，「行」個部分可以話只係機票，筆者之前去台灣徒步環島，慳住唔慳食嘅情況下，玩足兩個月都只係洗左大約4000港紙，之後去美國139日嘅行程，計埋機票都只係大約30000蚊。

4. 感受當地人嘅熱情
「咩話？行路？你痴線嫁？」我相信無論你去到咩國家都好，徒步旅遊都唔係一件容易嘅事，當地人知道你做埋啲痴線野，俾個叻你不特只，好多時會請食飯請飲野，甚至有人試過俾現金資助筆者嘅行程，係你最辛苦時遇到好人嘅幫助，都咪話唔感動！

5. 深入遠離公路嘅美景
自駕去睇名川大山？最多咪只係遠距離見到座山，望兩眼就走人，但徒步的話就直頭可以行入座山入面，近距離試下俾山包圍嘅感覺，又或者去到真‧隱世温泉，晚黑就可以係遠離城市嘅地方睇到超壯麗嘅星河！

6. 辛苦過後嘅成功感
徒步旅行的確係好辛苦，但都會有好大回報，其中一樣就係成功感，當你行N日先去到一個景點或者城市，去到個陣一定超感動。筆者試過行超過2千公里先去到美國最高峰，係山上見到啲自駕遊嘅旅客，當佢地大讚風景好靚時，我內心其實係不斷讚歎緊自己嘅堅持，風景再靚，都已經唔係重點。

重行人生 Facebook 專頁

更多：
Fitz.hk Facebook專頁
[重行人生] 台灣徒步環島準備攻略
[重行人生] 截順風車其實唔難
[重行人生] ​​​澳洲塔斯曼尼亞登山遊記: Walls of Jerusalem (二)
[重行人生] ​​​澳洲塔斯曼尼亞登山遊記: Walls of Jerusalem (一)
阿寶@重行人生@Fitz.hk