香港奇景大集合 (一)

 

重陽臨近，又提醒大家係郊遊季節。我哋集合過去介紹嘅7大香港奇景，等大家可以喺呢個時節導人上山，齊齊感受山野之樂。

最得意：芝麻灣 肥豬石

肥豬石位於芝麻灣半島，下徑碼頭側邊。有人話，石頭似足有隻大肥豬企喺海上面，又怕畀啲浪整濕身，所以雙腳縮喺嚟。

路線：

1. 長洲搭街渡至下徑，臨登岸前可近距離欣賞肥豬石
2. 沿芝麻灣郊遊徑，中途有路落下徑。

最驚險：西貢 雷打石

雷打石，可以係一座山，高379米；亦可以係一嚿石，位於雷打石山頂附近。呢座山喺西貢麥理浩徑第三段側，一般上麥徑操山嘅朋友，都係過門不入，只係喺山下經過。其實，如果唔係時間緊逼，不妨上頂睇下。因為欣賞郊野景色，亦不失為操練時一個好嘅調劑。

路線：大致而言，去雷打石除咗可以沿麥徑三段出發，過咗樟上、畫眉山，到M060標距柱左右，右手邊上山就係雷打石。嫌麥徑悶，亦可以由北潭涌，經太墩上雷打石。

最神秘：草山 交叉石

聳立喺黃竹洋對上嘅草山山脊，電塔側邊一嚿有個大交叉嘅石頭，唔知由幾時開始，去開草山嘅山友，都要專誠行兩步過去打咭。

路線：最直接嘅路線由城門水塘主壩，經針山山腳沿林道上草山。到麥徑標距柱M134左近，有小路可到達電塔側之交叉石。沿小路可落火炭。

最偏遠：黃竹角咀 鬼手岩

鬼手岩係香港地質公園嘅地標，好多人都係相入面睇過呢舊「奇石」。不過，由於路途遙遠，位置偏僻，所以唔少山友只係隔住個mon睇下相。

最短嘅線，就係由西貢黃石碼頭，租「大飛」或「細飛」(即快艇，大嘅可載約20人，細嘅載6至7人)，坐船30分鐘直達黃竹角咀，然後依以下路線到烏蛟騰搭小巴走人。

• 路線：黃石碼頭 (船) > 黃竹角咀 > 大嶺 > 跌死狗 > 鹿湖峒 > 上下苗田 > 烏蛟騰
• 距離：12公里 (黃竹角咀至烏蛟騰)
• 需時：10小時
• 難度：4.5星 (5星最難)

Google Map缺乏山徑資料，只供參考。行山時必要依據適合之郊遊地圖。

最浪漫：城門水塘 白千層

圍繞住城門水塘，其實種滿白千層樹。而每當雨季，水位上升，就會淹蓋呢啲樹。位置大概係城門水塘正北方嘅沙州。

呢啲樹，其實原產自澳洲，係生長於沼澤地方，所以就算佢哋畀水淹浸，都唔使驚佢哋會浸死！

路線：可由城門水塘小巴總站，經旅客中心沿菠蘿壩自然教育徑，再走林道，步行約30分鐘到達。

更多：最壯麗：萬宜 破邊州

破邊洲嘅位置，係香港地質公園範圍，呢一帶嘅地質，係形成於大概1億年前嘅侏羅紀時期，當時有多次火山爆發，熔岩同火山灰嘅積聚，造成咗六角石柱嘅地質。

要欣賞破邊洲，有以下方法：

1. 企定定喺萬宜東壩離遠睇，感受大自然嘅鬼斧神功
2. 綑邊攀爬花山，甚至登上破邊洲！好處係可以近睇，仲可以睇埋沿岸嘅海蝕洞。問題係呢條路線相當危險，要有經驗人士帶領，仲要視乎海浪情況，太大浪唔好行。
   詳細路線見《[真．破邊洲] 行程全攻略》。
3. 由萬宜東壩入口之紀念碑，沿山徑過花山頂，到達花山之峭壁，再近睇破邊洲，仍可感受箇中震撼(步行約1小時)。

最離奇：大澳 將軍石

大澳將軍石係大澳地標，身高10米，面對著伶仃洋。離遠睇，石頭就似一位將軍倚住山崖休息。

路線：要睇將軍石，最簡單就係坐渡輪往返大澳 (屯門或東涌)，喺大澳石埗仔碼頭沿海而行，約15分鐘就可望到。能力夠嘅話，仲可以穿過石灘爬上去！

更多：
Fitz.hk Facebook專頁
[香港奇景] 芝麻灣 肥豬石
[香港奇景] 西貢 破邊洲
[香港奇景] 雷打石 有山又有石
[香港奇景] 黃竹角咀 鬼手岩
Fitz Hiking 行山