馬大石澗意外死者「傑哥」創辦行山會曾搜索意外失踪者

三號風球之下馬大石澗洪水暴漲 圖: 881903.com

7月20日早上，三號風球懸掛，馬鞍山大水坑馬大石澗發生意外。警方於10時46分接報，一名男子於「英雄瀑」懷疑被洪水沖去，失去蹤影。6小時後，經消防、直升機以及蛙人合力搜救，於距離英雄瀑50米集水區尋獲男子屍體。據《香港01》報道，死者為蕭文傑。

鷹傑之友嘅布襟章，甚有古風。

「傑哥」創辦「鷹傑之友」

人稱「傑哥」嘅蕭文傑，於2005年成立行山會「鷹傑之友」，將一班唔同背景、喜愛行山嘅香港人組織起來。而「傑哥」有二十多年行山經驗，最鍾意行山澗，《明報》2007年一篇訪問更稱佢為「石澗專家」。

「傑哥」除咗義務組織行山隊，亦曾參與搜救工作，2007年曾召集20多名山友到大嶼搜救失踪人士，最後於倒腕崖搵到失踪者屍體。

今年春季鷹傑之友仍有活動 圖: Facebook

經驗豐富嘅「傑哥」不幸葬身石澗，提醒面對大自然，人類其實非常渺小。希望死者親友可以盡快走出悲痛，大眾亦可以此為鑑，避免在危險環境下進行戶外活動。