露營,同一般運動唔同,因為會有長時間休息、放空或低運動量嘅活動。而大多數人都鍾意去近海、高原甚至攻頂,根據統計,海拔每上升100米溫度就平均低0.6度,再加上潮濕及風寒效應,體感溫度會更加低,所以保暖好重要。

但冬季嘅衫收納起上嚟都好大舊下,為咗唔俾啲衫佔用太多空間,就要留意返應該要準備啲咩,亦唔係執多幾件衫去。

頭、頸

當天寒時,人體因為要保護重要器官,會加強咗熱能喺頭同心臟部份,所以頭部嘅散熱會比一般部位高。只要鎖得住個熱量,就已經好好多。

冷帽、頭巾、頸箍等都幫到手。但要注意返唔好太焗,因為出汗後又無法排汗下,好易感冒。

上半身

常用洋蔥式著法,一般分三層:

  1. 內層 (排汗層)
    要選擇啲吸濕排汗嘅內衣,如: heattech、superwarm之類,做成輕量保溫,同時又會排汗唔駛因為出汗而焗到感冒。
    選購時唔好太貼身,舒適為重。
  2. 中層 (保溫層)
    依層係要黎鎖住體溫用,羽絨、fleece等都非常適合依層度用,但注意返,唔係著得多就代表好,有用嘅,一件就夠。
  3. 外層 (防風防水)
    空氣中嘅水份會導致啲衫褲濕,而濕咗嘅衫褲又會將皮膚上嘅體溫經冷空氣帶走。所以最外層就係保護入面兩層用,同時協助皮膚表層形成熱氣隔絕層。

下半身

唔好再著啲壓力褲了,完全唔保暖,如果真係要著,都請外面加多條褲。牛仔褲都唔好再著,一黎活動唔方便,二黎一出汗就好難乾。應該揀返啲戶外褲如雪褲或有毛底嘅legging等。

如果真係唔夠禦寒衣物,以下道具幫到你

  • 太空毯
    無敵的求生道具,可防風防水,更因為鋁箔關係,可反射約90%體溫,防止熱能外洩。
    使用時要注意「傳導」,因為太空毯太薄,如果直接訓地下,都係一樣會凍死你。所以都一樣要用睡墊,背囊之類隔一隔先用。

  • 懷爐
    一種金屬制嘅暖手爐,有分充電式、充熱水式、充燃料式,一般可續航6-12小時。以時間、重量、價錢、環保計,懷爐都大勝暖手包,不過依度唔詳盡介紹了,有興趣再講。

  • 暖水袋
    注入熱水後,暖水袋就會發揮佢作用,但要小心皮膚被灼傷。

  • 暖爐
    夏天都有户外風扇,冬天一樣有户外暖爐。
    通常行gas的,要睇清楚用高山定卡式氣。使用時要小心燒著草地及睡眠時要關掉。

  • Food bar
    防止熱量流失雖然重要,但增加熱量來源同樣重要,food bar、熱飲、熱食等,都係增加熱量來源之一。

戶外唔係俾你哋做 fashion show 去打卡影相的,穿著正確衣著,咁先係山中型人。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > [老hike都去camp] 露營經驗分享 戶外保暖