北潭涌停車場加設咪錶，最多泊車4個鐘揸車行山友頭痕

近日唔少人發現西貢北潭涌，位於「北潭涌遊客中心」旁嘅政府泊車位，突然加裝泊車咪錶。呢度泊車位原為免費，部份變為兩小時錶位後，就算用「入錶易」App 遙距入錶，最長都只得四小時。唔親身按時入錶嘅話，隨時被罰$320。

暫時安裝咗咪錶嘅車位，佔停車場大約一半。

北潭涌咪錶位安裝情況 (截至5/6/2022)

第一行盡頭免費

第二行右邊免費

近小食亭免費

入錶四個鐘夠唔夠?

有行山人士就歡迎政府安排，因為就算晏咗出發，都仲可能搵到位泊車。六月四日有車主報料，話中午時份入到北潭涌仲泊到要入錶嘅車位。當然，唔使錢嘅泊車位，仍然一位難求。

不過另一方面，好多人就覺得「四個鐘頭錶位」根本無乜用。事實上，北潭涌係西貢多條主要行山徑起點及終點，大多數行山路線隨時要行全日。亦即係增設呢啲「四個鐘頭錶位」而減少免費泊位，變相令行山人士更難搵位。所以，有車主提議政府，改良遙距入錶功能，容許可以再續多幾次，令大家可以泊足全日，咁就方便市民。

杜絕死車?

仲有一點受到爭論，就係安裝錶位是否可以杜絕長年霸佔車位嘅「死車」。有人認為，北潭涌唔係全部泊位安裝咪錶，所以死車仍會霸佔免費泊車位。其次好多「死車熱點」，例如大網仔、西沙公路、石澳、清水灣、大坳門等，仍然被大批死車霸佔，警方似乎束手無冊。要令車位得以善用，就要政府好好執法，以免被人濫用。

要注意嘅係，行山最好避免揸車。私家車會製造空氣污染，又會堵塞交通，可以的話，都係盡量乘搭公共交通工具去起點。