圖:政府新聞處
今年炎夏提早嚟到，天氣變得極端，行山意外亦大幅增加，其中一個大家激烈討論嘅問題係: 單獨行山更容易發生意外?
單拖行山不是原罪
The hiking Database 山野‧新聞庫 曾有一篇長文《單拖行山不是原罪 最重要是安全意識》，表明唔少人立場。作者以佢幾十年帶隊經驗分析:「年資愈深就愈容易忽略安全事項，但意外並不會因為年資長而消失，只是出現率較低，但出事的時候就人人平等。」
文章提醒大家，行山意外並唔係因為幾多人參與而發生，意外發生原因係大家漠視安全守則，以及輕視行山活動。所以，單獨行山並唔係原罪，如果唔重視安全意識，幾多個人去行山都會出現意外。
事實上，睇番呢幾個月以來嘅行意外，亦畀到大家一啲啟示。
----- 廣告 Ad -----
2021年4月至6月上旬行山意外 (共19宗)
| 日期 | 地點 | 意外詳情 | 行山人數 | 後果 |
| 2/4 | 大嶼山老虎頭 | 卅四歲外籍女子失足墮山受傷 | 2人 | 送院治理 |
| 2/4 | 香港仔玉桂山 | 於玉桂山失足墮下 | 3人 | 送院治理 |
| 2/4 | 香港仔鴨脷排 | 於鴨脷排失足墮下 | 數人 | 送院治理 |
| 2/4 | 西貢米粉頂 | 一名男子行完蚺蛇尖後，於米粉頂中暑，由直升機救出 | 2人 | 送院治理 |
| 3/4 | 跑馬地聶高信山 | 攀石活動失足墮崖 | 4人 | 送院治理 |
| 15/4 | 飛鵝山 | 女子於十五日離家行山失踪，經多年搜救，於十八日搜獲其屍體 | 1人 | 死亡 |
| 20/4 | 船灣郊遊徑 | 六十八歲男子早上於烏蛟騰行山，於中午失去聯絡。深夜時於跌死狗搜獲屍體 | 1人 | 送院治理 |
| 23/5 | 將軍澳鴨仔山 | 女子行上鴨仔山後，突然昏迷不醒，由直升機送到醫院搶救 | 8人 | 送院治理 |
| 26/4 | 大嶼山大東山 | 19歲土耳其藉男子於大東山墮山受傷，由直升機送院治理 | 2人 | 送院治理 |
| 1/5 | 馬鞍山彌天棧道 | 40歲女子墮山，急召消防員到來拯救 | 5人 | 送院治理 |
| 20/5 | 西貢龍蝦灣 | 男子中暑 | 8人 | 送院治理 |
| 22/5 | 大嶼山黃龍石澗 | 58歲男子墮崖 | 數人 | 送院治理 |
| 22/5 | 香港仔鴨脷排 | 60歲男子中暑 | 數人 | 送院治理 |
| 23/5 | 大埔九龍坑山 | 61歲男子中暑 | 4人 | 送院後不治 |
| 23/5 | 西貢橋咀島 | 72歲老翁中暑 | 4人 | 送院治理 |
| 23/5 | 八仙嶺 | 32歲男子出發行山，至晚上家人發現失踪。搜尋五日後，於黃嶺坳其屍體。 | 1人 | 死亡 |
| 5/6 | 大嶼山梅窩 | 一男子被發現倒臥於梅窩行山徑，送院後實不治 | 1人 | 死亡 |
| 5/6 | 獅子山 | 62歲男子失足 | 5 人 | 送院治理 |
| 5/6 | 大嶼山伯公坳 | 22歲男子行山時身體不適，口吐白沫 | 3人 | 送院治理 |
上述資料摘自 歷年山難意外事件簿 ，基本數據分析:
- 兩個幾月以來，一共有19宗意外
- 4宗致命意外，3宗涉及單獨行山
單獨行山令意外更致命
上面19宗意外，大多數係因為失足墮崖或天氣因素 (中暑) 導致，如果作充分準備，好好規劃路線，帶備足夠裝備，應可降低意外機率。而萬一發生意外時，同伴可將意外嚴重性減低，例如可協助最基本治療或尋求外界救援。
相反來說，如果單獨行山，發生意外時就有可能出現以下情況:
- 身體狀況 (如昏倒) 或身上器材 (如手機) 未能適時發出求救訊息。6月6日梅窩意外，假若男子倒下時有同伴報警，或可及時拯救
- 一個人面對意外時，往往因驚惶失措作出錯誤判斷。如5月發生於八仙嶺嘅失踪事件，有人懷疑該獨行人士在缺水情況下，試圖硬闖密林而墮山失救。
所以，筆者同意獨單行山並非山野意外嘅主因，而多人去行山未必會令活動較為安全，不過單獨行山實在會提升活動風險。
雖然話「單拖行山不是原罪」，但既然會提高風險，單拖行山並唔係一個明智選擇。
----- 廣告 Ad -----
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。