圖片來源: http://jojit.mysinablog.com/
幾位初為父母嘅行山友聚首一堂，話題由行山講到去湊小朋友。佢哋不期然覺得，要帶住小朋友搵地方行山，一啲都唔容易。有啲小朋友好驚昆蟲，即係唔可行密林；有啲小朋友好百厭，父母又驚佢會周圍跑周圍跳，又話唔行得山澗；有啲父母本身係行山新手，就要搵條路可以顧及大人小朋友……
而我覺得，香港嘅郊遊徑，總有一條喺左近。各個地區都有一啲規模唔大嘅行山徑。屯門有屯門徑，青衣就有青衣自然徑，觀塘藍田就可以行上魔鬼山，港島就更加方便，差唔多區區都有座山。所以我覺得，如果只係帶小朋友感受下行山樂趣，就不妨近近地喺屋企附近行下先。
至於今次介紹呢5條親子行山徑，就各有特點，滿足唔同家庭需要：
----- 廣告 Ad -----
1. 城門水塘
路線：主壩至菠蘿壩圍繞一圈，路程8.5公里，大人不停步大概要行3小時
特點：全程行城門水塘林道嘅石屎路，完全適合一家大細，就算推住BB車都完全無問題。
注意：城門水塘馬騮為患，驚馬騮嘅大人小朋友千祈咪搞佢（其實所有人都唔應該理佢）
交通：荃灣兆和街搭小巴82號，總站落車。
城門水塘全程石屎路，又多樹蔭，推住BB車行都得。
2. 新娘潭
路線：新娘潭自然教育徑，上落坡幅甚小。全程0.7公里，需要1小時
特點：集合自然景觀（瀑布）、郊野環境，以至都市傳聞（新娘潭傳說）於一身。
注意：新娘潭瀑布旱季就無乜水，雨季就好大水，要小心小朋友百厭。
交通：大埔墟火車站搭小巴20C（總站在烏蛟騰），或九巴275R（只在假日行走）
因為有靈異傳說，有人農曆七月唔敢去新娘潭。唉，21世紀，太空船可以飛到去冥王星，唔係仲信呢啲嘢呀？
3. 太平山頂
路線：山頂纜車站出發，沿盧吉道及夏力道，圍繞山頂一圈。全程3.5公里，需要1.5小時
特點：著名旅遊書《Lonely Planet》選為全球10大最佳步行徑之一，360度維港景色。全程石屎平坦道路，景靚易行，配套充足。
注意：無乜需要注意
交通：坐纜車，或坐巴士15號
山頂被選為全球最正10大步行徑
4. 南丫島
路線：榕樹灣→風力發電站→洪聖爺灣→索罟灣。全程7公里，需要3小時
特點：坐渡輪對唔少小朋友嚟講已經係新鮮事，加上仲有南丫島特有嘅中西合璧嘅民風，大人小朋友都一定鍾意。
注意：部份路段未必有樹蔭，要注意防曬。
交通：中環港外線碼頭坐船到達
----- 廣告 Ad -----
南丫島地標三支香雞。當然，行山見到呢三支嘢有啲格格不入，不過最後大家咪搵佢做背景Selfie。
5. 海下灣
路線：大灘→攔路坳→海下。全程6.5公里，需要3.5小時
特點：香港首個海岸公園
注意：黃石至海下灣係經典行山路線之一，假日可能比較多人
交通：巴士 94 號、巴士 96R (假日)， 大灘落車
更多有關海下灣嘅資料，可見另文《冰爽夏日好去處 — 海下灣》
海下灣海洋生物中心
