烏蛟騰村籲讓居民優先上20R小巴，山友隔空論戰

圖: 北區之友 Friends of North District (上水、粉嶺、沙頭角和打鼓嶺)

大埔烏蛟騰村村口最近豎立告示板，呼籲乘搭20R小巴線嘅「外來及郊遊人仕」畀村民優先上車，引來行山人士同村民隔空論戰。

烏蛟騰交通情況

小巴線20R前身係20C，於2014年開辧，路線全長16公里，行車時間長逾1小時。呢條線開設嘅主要目的，係解決烏蛟騰村交通不便嘅問題，因為烏蛟騰村居民唔多，所以小巴班次甚為疏落。

小巴每隔60至90分鐘一班，一部小巴有19個座位，一個行山團只要有十人八人，再加埋其他行山客，要逼滿一部小巴絕對唔難。

九巴275R線雖然2020年2月延長路線至烏蛟騰，仲要係10至20分鐘一班，不過只限於星期日及公眾假期行走，星期六及平日係無得搭。

對於呢塊告示板，唔同人有唔同反應。

圖: 香港巴士大典

居民意見: 將心比心

Facebook 群組 北區之友 Friends of North District (上水、粉嶺、沙頭角和打鼓嶺) 最先發佈呢張圖片，群組內大多數成員都對告示板內容表示理解同支持:

• 很多這些鄉郊路線都是村民努力爭取回來，例如鶴藪等等的村落。所以，我認為讓村民優先上車是很合理。作為行山人，去到任何地方，都應不騷擾當地所有人和生態環境。
• 整返張村民證，村民一條隊，遊客一條隊，村民證上車先，攪掂。保障村民利益優先好合理丫
• 我住果條村差唔多，自從禁區解禁之後多左行山，睇日落人士
• 本身個地方冇發展，得1架車又唔夠班，其實好慘。個意思就係 你去玩搭1次半次的士 你緊係冇所謂。你試下日日買個餸呢d咁小既事都要搭的士，你就知咩料。
• 你可以唔讓都得，條村都係話幫幫手，冇兇你既
• 玩還玩……唔好影響當地既人係常識吧……
• 275R 想開星期六都俾小巴反對，有咩辦法

圖: 香港巴士大典

行山人士: 我都係納稅人點解要我讓?

另一邊，一個集中行山愛好者嘅Facebook群組，成員反應完全唔同。

• 我又唔係住果頭，話知佢地天光排到天黑，政府做唔做野都唔關我事……佢地想出去買晚餐咪早上9點去排隊囉 (筆者按: 曲直難分)
• 政府問題規劃不善，無理由要市民承擔
• 應該叫小巴公司改善服務，根源的問題
• 我就建議村民自資開村巴，好似青山道、屯門D屋邨屋苑咁，淨係車村民，外人唔准搭都重得！
• 私家地方?
• 想快就call的士
• 寫得出果下好野，現在主要客源應該係外來客，小巴靠村民維生就餓死好耐。主客都未分清，唔駛理村民啦。
• 小巴係用來方便市民，唔係淨係村民，如果係經常性係周末假日唔夠就應該有加班安排才可解決問題!

烏蛟騰係進出荔枝窩嘅必經之路

----- 廣告 Ad -----

亦有好多行山友，行山唔係大晒，呼籲大家將心比己，一人讓一步，盡量畀居民優先上車，以解決村內交通問題。

無可否認，交通規劃始終係政府嘅工作，小巴班次不足，巴士服務亦唔可以加強，政府確實要積極處理。

巴士、小巴路線資料: 香港巴士大典