疫症行山 9大注意事項

今個周末想出外走走嗎?

由於上星期各山徑有人滿之患，太多人聚集反而有傳播病菌的風險。我有少少建議:

1. 唔好約太多人一齊行 。如果一行10個8個人，等人、搭車、食飯去廁所都會有一大班人聚集，增加風險，而且香港的路好窄，成班人慢慢行就會做成塞車。建議3、4個人，有個照應就好了。

2. 可以選擇屋企附近的路線。唔好妄想揸車去行山徑入口有位停低勒，即使俾你泊係避車處又會阻住其他人掉頭。不如近近地，行去屋企附近嘅路線啦。

3. 距離: 選擇可以兩個小時內完成的路線啦，至少可以去少啲公廁，減低風險。

4. 裝備: 運動褲、行山鞋、短袖衫、風褸、charge 滿電的電話，背包，不要穿皮鞋、牛仔褲或者皮褸。

5. 水: 每人每行1小時就預700ml 清水，今個 weekend 熱少少，而且沿路飲水機都封哂，帶多啲水安全。

6. 垃圾，呢樣最緊要! 請自備垃圾袋，帶走所有口罩呀、果皮呀、紙巾呀，返屋企附近掉， 唔好掉入郊野公園的垃圾筒! 點解? 一來山上多人，垃圾筒滿哂； 二來，野豬野狗會翻垃圾筒，搞到一地都係。記住，一件垃圾都唔應該留係山徑上。

7. 口罩: 我唔係專家，個人覺得戴口罩行山好辛苦，加埋大汗就成個口罩濕哂，唔可行。如果唔戴口罩，係山上就唔會講咁野囉，對面有人行過就讓開D。

8. 音樂: 好多人鐘意一路行山一路播歌，無分種族年齡。但係個山上多左人，唔係個個都鐘意聽你的歌，不如暫時熄一熄部機。

9. 練山的朋友: 知道知道，無野可以阻到操山訓練。不過條路多左人，咪唔好跑咁快，有人係前面咪停一停等一等。現在好多老人家細路仔都出黎行山，佢地未必及時讓到路俾你。