行夜山注意．民間智慧: 黑泥、白石、水反光

圖: 囉嗦大叔

要對抗酷熱天氣，行夜山係其中一個方法，不過人體五感喺日間同夜間有明顯分別 — 視力會變差，反應會變慢，心理亦較為脆弱；所以如果唔係由有經驗人士帶領，一般新手不宜夜行。對於行夜山，山界老前輩有一句口訣: 黑泥、白石、水反光。

民間智慧: 黑泥、白石、水反光

呢個講法，利用月光反射地面去區分山徑情況:

1. 泥土係唔會反光，所以望到地下黑忟忟嘅，通常係泥土
2. 石頭含有礦物，月光照上去會反光，呈白色
3. 見到有反射光芒，應該就係水: 可以係河流，亦可以係水氹

雖然呢句口訣有用，但其實只係一個好基本嘅大概。試過有一次，由夜晚由北潭涌行入上窰，沿路不時見到一條白色物體，以為係石頭可以跟住行。點解行下行下，突然踏咗個空，差啲跌落河。原來嗰條白色嘅物體，係一條沿山路而建嘅白色水管，水管中途越過小溪，跟住行差啲跌落河。

行夜山技巧

1. 必要裝備: 電筒、哨子 (用以求救或與隊友通訊)、指南針、禦寒衣物 (夜間溫暖會驟降)
2. 起步前，應閉合雙眼，讓眼睛適應黑夜環境
3. 切勿獨自夜行
4. 應以小隊形式進行，領隊押後，易於觀察及照顧全隊情況。
5. 應踏在前行者的落腳點上，以確保安全
6. 行進時保持隊形
7. 應通知尾隨者要注意危險的地方
8. 不要邊行邊觀察，有疑問先停下來
9. 利用聽覺補足視覺不足，如水聲、車聲或狗吠聲等
10. 盡量捕足可視光源，如碼頭、燈塔或導航燈，以確定身處位置和地點
11. 應在可能範圍減弱電筒的光源甚至關閉電筒，將可視範圍擴大
12. 休息時可閉目，以令雙眼適應黑夜 (切勿玩手機)

行夜山注意事項

1. 跟隨有經驗人士進行夜行活動
2. 使用電筒勿搖晃不定或照向別人的眼睛
3. 遇上強光時應用手遮擋或閉上一隻
4. 在閱讀地圖時，應用手、衣物或濾光鏡減弱光線，避免刺激雙眼
5. 一些常用或重要的物件，如指南針、急救包等，應放在背囊隨手可取的地方，切勿在黑夜中翻找背囊物件，避免遺失
6. 盡量走在山脊、空曠或視野較佳的地方
7. 除非為了求救，避免進入村落，以免騷擾村民或被惡犬襲擊

資料:《山藝讀本》