青大石澗石臺 狗牙嶺安全繩 「老屎忽」好心做柒事

按: Netflix字幕用咗書面語。原對白係:「我呢啲老屎忽!」 圖:《嚦咕嚦咕新年財》

「老屎忽」係香港本土用語，原意指職場上恃老賣老嘅前輩。性格特徵: 唔識得與時並進、不肯吸收新事物，自私自利，坐享其成。口頭禪:「我食鹽多過你食米」。先旨聲明: 年紀大嘅人唔一定係「老屎忽」，好多伯伯嬸嬸都好可愛，大家無需對號入座。

青大石澗石臺

圖: 山友Ryan

2月19日，山友 Ryan 行經屯門青大石澗，見到兩位伯伯拎住桶沙石，起緊一幅石臺。

Ryan 問阿伯: 「幅牆你整?」
阿伯答:「係，因為啲石『哽』欏柚，咪整個臺出嚟囉。」

Ryan 並且發現，附近更有用石屎舖設嘅花圃，裏面種有植物。而《蘋果日報》更發現，石澗不遠處有人搭建木屋，並開墾田地，引河水灌溉。

圖: 山友 Ryan

伯伯坐石頭嫌哽屎忽，「老屎忽」係咪太過嬌嫰，好容易整傷?

引述《蘋果日報》訪問前輩戴緻賢嘅講法:「該名大叔以石屎填平石頭，對大自然及地貌造成永久性破壞，不能復原，此舉極度自私及令人討厭。」

狗牙嶺的「安全繩」

最近分別有幾名山友發現以險境聞名嘅大嶼山狗牙嶺，設置咗多條安全繩索，早前亦有人影到有人拎埋電鑽去架設鐵鍊。

繩索可以保障行山安全，但先決條件係條繩唔可以爛，架設繩索嘅位置亦要好講究。不過，呢啲由「好心人」起嘅繩索、鐵鍊係咪真正安全，確實令人懷疑。市民過份倚賴呢啲「私房」安全設備，隨時會做成奪命意外。

好心做柒事

用石屎起個臺，身水身汗拎埋電鑽架設「安全繩」，「有心人」應該係出於「造福大眾」嘅心態，方便自己方便人。不過佢哋如果真係希望造福大眾，不妨幫手執下垃圾，相信大家都會好支持你呀。