37歲越南人 Ho Hoang Hung，疫情下兩年未見過喺印度孟買打工嘅老婆。呢名掛住老婆嘅好男人，趁住疫情相對穩定，決定搭飛機去孟買，點知飛機去到泰國曼谷時，先發現要拎住印度簽證先可以轉機。Ho Hoang Hung 因為身上盤川使剩一半，又好掛住老婆，就孤注一擲搭巴士去布吉島，然後買隻橡皮艇划船過去，直線距離足足有2000公里，而且孟買仲要喺印度半島嘅另一邊。
鏡頭一轉，泰國軍方收到漁民求救，話喺大海中心截到一隻橡皮艇。艇中男子身份不明，飢渴交逼，身體情況麻麻。於是軍隊出動救援，救返呢名男子。
----- 廣告 Ad -----
呢名男子就係 Ho Hoang Hung，佢喺海上「划艇」18日，但仲未離開泰國，只係划咗大概80公里。佢話遇到大浪同急流，筋疲力盡。海軍進行調查，話橡皮艇只有一支礦泉水同10包即食麵，船上無 GPS、指南針，連一份簡單地圖都無。
結果 Ho Hoang Hung 被送返去泰國斯米蘭群島，而家等緊越南同印度政府點解決件事。最重要係，搞咗咁多日 Ho Hoang Hung 仲未見到老婆!
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。