前沙頭角村長 Sub 4無難度

前言
每個人一定有一個跑步故事。無論，你係揚威奧運，定係只不過係細路時候玩「捉依因」，你一定體驗過跑步帶畀你嘅快樂。

呢次，我哋去到香港最北嘅沙頭角。呢位沙頭角村長，佢個女一定唔係李愛 （因為佢唔係姓李），不過佢肯定係一個跑痴，仲係中毒好深嗰隻。

呢項比賽，對四哥 (右二) 極有印象。因為完全在主場作賽，仲會跑過自己屋企。

一句說話成為跑痴
藍天，人稱「四哥」，2004年成為沙頭角新村村長，今年49歲。呢位村長，一直以為自己無運動細胞，直到2008年，隔離村平時有跑步嘅毛村長，就搵埋四哥一齊跑步，仲話：

「其實你外形都幾跑得下，不如一玩下啦。」

就係咁，四哥以41歲之齡，踏上跑步之路。不過佢話佢自己當時只不過「盲目追求里數」，喺大埔吐露港「亂咁跑下」，乜訓練計劃都無。操咗半年，到2009年，報名參加2009年嘅渣打馬拉松全馬。

唉，佢咁講，令筆者諗起當年渣打全馬係唔使成績證明，又唔使鬥快報名嘅唏噓往事！而且亦覺得好奇怪，之前又話自己無乜運動細胞，搞乜一嚟就跑全馬？咁最後跑成點，使唔使上巴士呢？

四哥答：「嗰年跑咗3小時43分咋。」

？！

話四哥係跑痴一啲都無錯。最佳證明，就係佢周遊列國咁跑。左邊喺台灣，右邊係北海道。

----- 廣告 Ad -----

人人都話「長跑無捷徑」，操練半年，就可以跑Sub 4，係咪沙頭角啲水土一如肯雅，人人天生係跑手？

四哥話：「我話我無運動細胞啫，但係我其實有做開運動。以前成日喺屋企跳繩！」

答案竟然咁簡單！

認真練跑 VS 越跑越短
補充一下先，唔係以為好似講到好巴閉，佢講自己跑史嘅時候，完完全全好淡然，你亦Feel唔到佢好執著每一分每一秒。

正如當佢講到參加陳家豪嘅跑會，佢只係好平淡咁話：

「2009年之後，年年都有跑渣馬，唔使點練之下，都係3小時30分咁上下。不過之後覺得自己年齡開始大，所以參加咗家豪嘅跑班，希望可以跑多幾年啦。」

參加陳家豪嘅樂家跑會後，就認識了「師母」姚潔貞。

但係，人始終敵唔時間流逝。呢幾年，四哥因為工作關係，已經練少咗長課，亦唔好彩成日受傷。所以佢已經無跑全馬，大部份都係參加10Km以下嘅賽事。

四哥今年仲喺吉隆坡嘅10公里賽，以44分鐘完賽，年齡組別排行第6，確實係寶刀未老。

四哥強調，跑步唔單只係鍛煉身體，其實仲可以修煉人性：

「喺跑班識嘅朋友，全部都係好人嚟！跑步嘅人，一定唔會食煙，唔會飲酒，更加唔會吸毒。咁健康嘅活動，點解唔繼續玩？」

今年去吉隆坡跑10K

跑步與慈善
四哥為人咁正直，除咗做村長之外，亦有喺自願機構做義工。

佢喺五年前，參與過小母年嘅雲南採訪團之後，決定以行動支持。四哥解釋：

「小母牛呢個組織，唔同一般慈善機構，佢唔會將善款直接畀受惠人士。而係鼓勵佢哋自力更生，例如利用善款去購置農具、家畜，希望可以改善佢哋生活！」

佢仲話：「當你參加佢哋嘅探訪團，你就會感受到當地農民情感，你真係會覺得幫到佢哋！」

四哥積極鼓勵小母牛舉辦Race to Feed長跑活動！而今年Race to Feed 10公里長跑賽，亦會親身落場！

報名及詳情：小母牛Race to Feed 2016

所有參加者凡於9月16日前報名可享有早鳥報名優惠，先報先得額滿即止!

更多：
Fitz.hk Facebook專頁
[年少多好] 跑步環台1000公里 HeHe畢業之旅
[專訪馬高教練] 同你講心的魔鬼
一打激勵人心跑步金句
Fitz Running 跑步